បង្ក្រាប​បទល្មើស​នេសាទ​បំផ្លាញចោល​របាំងស្បៃមុង​ ១១ កន្លែង​ប្រវែង ៨០០ ម៉ែត្រ

លោក លី ឡា នាយខណ្ឌរដ្ឋបាលជលផលកំពង់ឆ្នាំងនៅល្ងាចថ្ងៃទី ៣ ខែសីហា ឆ្នាំ២០២២បានឱ្យដឹងថា សមត្ថកិច្ចខណ្ឌរដ្ឋបាលជលផលកំពង់ឆ្នាំងនៅថ្ងៃទី ៣ ខែសីហានេះ បានចុះប្រតិបត្តិការបង្រ្កាបបទល្មើសជលផលនៅចំណុចមេទឹកពាមឆ្កោក ដល់ខ្វែងឆ្លុះ ស្រុកជលគីរី។

ដោយប្រើប្រាស់កម្លាំងសរុប ១១នាក់ មានកាណូតបាឡាស្មាច់ ៣គ្រឿង។ លទ្ធផលបំផ្លាញចោលរបាំងស្បៃមុងចំនួន ១១ កន្លែង ប្រវែង៨០០ម៉ែត្រ លបលូស្បៃមុងចំនួន ១២មាត់ បង្គោលចំនួន២០០ ដើម ចាក់លែងត្រីចម្រុះ ចំនួន ២០ គីឡូ ចូលក្នុងទន្លេវិញ។

ដោយឡែកសមត្ថកិច្ចផ្នែករដ្ឋបាលជលផលផ្សារឆ្នាំង និងសង្កាត់រដ្ឋបាលជលផលចុងកោះ បានសហការជាមួយអធិការដ្ឋាននគរបាលក្រុងកំពង់ឆ្នាំងចុះពិនិត្យទីតាំងប្រជាពលរដ្ឋ ០៦ គ្រួសារមកស្នាក់នៅចំណុចទួលអំពិល សង្កាត់កំពង់ ឆ្នាំង ប្រកបមុខរបរកាវលៀសខុសច្បាប់។

ក្រោយពីពិនិត្យឃើញជាក់ស្តែងសមត្ថកិច្ចបានឯកភាពគ្នាធ្វើលិខិតព្រមាន និងបានឱ្យគាត់រុះរេីសម្ភារៈចាកចេញវិលត្រ​ឡប់ទៅផ្ទះវិញ។ ចំណែកសង្កាត់ជលផលបរិបូណ៍បានសហការណ៍ជាមួយអាជ្ញាធរឃុំឆ្នុកទ្រូ និងមន្ត្រីបរិស្ថាន ស្នាក់ការតំបន់ប្រើប្រាស់ច្រើនយ៉ាងបឹងទន្លេសាបប្រចាំខេត្តកំពង់ឆ្នាំង និងប៉ុស្តិ៍នគរបាលរដ្ឋបាលឆ្នុកទ្រូបានធ្វើការផ្សព្វផ្សាយច្បាប់ស្ដីពីជលផលប្រកាស ៤៥៨ ប្រក.កសក ស្ដីពីការកំណត់ប្រភេទឧបករណ៍នេសាទគ្រួសារដែលអនុញ្ញាតឱ្យធ្វើនេសាទក្នុងដែននេសាទទឹកសាបដោយមានការចូលរួមពីប្រជាពលរដ្ឋចំនួន៧៦ នាក់ ក្នុងនោះមានស្រីចំនួន២៥ នាក់៕

អត្ថបទ៖ ឈៀងថារិទ្ធ