ព័ត៌មានអន្ដរជាតិ

អាមេរិក ឲ្យ ចិន កុំប្រតិកម្មខ្លាំងពេក ចំពោះដំណើររបស់លោកស្រី Pelosi ទៅតៃវ៉ាន់

បានផុស

៣ years មុន

នៅ

ថ្ងៃសុក្រ ៥ សីហា ២០២២

ដោយ

សហរដ្ឋអាមេរិកបានស្នើប្រទេសចិនកុំឲ្យបញ្ចេញប្រតិកម្មខ្លាំងពេកចំពោះដំណើរទស្សនកិច្ចរបស់ប្រធានសភាអាមេរិកលោកស្រី Nancy Pelosi ទៅកាន់កោះតៃវ៉ាន់ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្នើសុំរបស់ទីក្រុងវ៉ាស៊ីនតោនបានកើតឡើង បន្ទាប់ពីទីក្រុងប៉េកាំងបានដាក់ពង្រាយយន្តហោះ និងធ្វើសមយុទ្ធយោធាបាញ់គ្រាប់ពិតហោះរំលងកោះតៃវ៉ាន់ និងធ្លាក់ចូលសមុទ្រដែលជប៉ុនអះអាងថានៅជិតតំបន់សេដ្ឋកិច្ចរបស់ខ្លួន ។

ទន្ទឹមនោះអ្នកនាំពាក្យសន្តិសុខជាតិសេតវិមានលោក John Kirby បានប្រាប់សារព័ត៌មាន MSNBC ថា “យើងកំពុងតាមដានរឿងនេះយ៉ាងដិតដល់ ហើយយើងបន្តជំរុញឲ្យរដ្ឋាភិបាលចិនកុំឲ្យមានប្រតិកម្មខ្លាំងពេក ជាពិសេសពាក់ព័ន្ធនឹងដំណើរទស្សនកិច្ចរបស់លោកស្រី Pelosi ទៅកាន់កោះតៃវ៉ាន់” ។

អ្នកនាំពាក្យរូបនេះបានជំរុញឲ្យប្រទេសចិនកាត់បន្ថយភាពតានតឹងដូចដែលអាមេរិកកំពុងធ្វើ ដោយសារតែកន្លងមកអាមេរិកតែងតែមិនស្វែងរក ក៏ដូចជាមិនចង់បានវិបត្តិនោះទេ ជាពិសេសអាមេរិកគឺព្យាយាមចង់តែរក្សាទំនាក់ទំនងជាមួយចិនប៉ុណ្ណោះដើម្បីបញ្ចៀសភាពតានតឹង ។

គួរបញ្ជាក់ថា លោកស្រី Pelosi បានធ្វើដំណើរទៅកាន់កោះតៃវ៉ាន់កាលពីថ្ងៃអង្គារ ជាផ្នែកនៃដំណើរទស្សនកិច្ចរបស់លោកស្រីទៅកាន់តំបន់អាស៊ី ទោះបីជាមានការព្រមានជាច្រើនពីទីក្រុងប៉េកាំងក៏ដោយ ។

ទីក្រុងប៉េកាំងបាននិយាយថា ទង្វើបែបនេះគឺជាការញុះញង់ធ្វើឲ្យខូចទំនាក់ទំនងរវាងសហរដ្ឋអាមេរិក និងចិន ក៏ដូចជារំលោភលើគោលនយោបាយចិនតែមួយផងដែរ ហើយជាការឆ្លើយតប បន្ទាប់ពីដំណើរទស្សនកិច្ចនេះហើយ ចិនបានចាប់ផ្តើមសមយុទ្ធយោធាទ្រង់ទ្រាយធំជាមួយនឹងការបាញ់គ្រាប់ពិតជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ US News

ចុចអាន ៖ រុស្ស៊ី ថា លោកស្រី Pelosi កំពុងធ្វើឲ្យ អាមេរិក ជួបផលវិបាកជាសកល