ចិន លុបចោលជំនួបជាមួយមន្ត្រីការពារជាតិ អាមេរិក ដោយសារលោកស្រី Pelosi

ទីក្រុងប៉េកាំងបានលុបចោលកិច្ចប្រជុំរវាងមន្ត្រីការពារជាតិចិន និងសហរដ្ឋអាមេរិក បន្ទាប់ពីដំណើរទស្សនកិច្ចរបស់ប្រធានសភាអាមេរិកលោកស្រី Nancy Pelosi ទៅកាន់កោះតៃវ៉ាន់នាពេលថ្មីៗនេះ ។

ក្រសួងការបរទេសចិនបានប្រកាសថា ទីក្រុងប៉េកាំងបានសម្រេចចិត្តលុបចោលកិច្ចប្រជុំការងារទ្វេភាគីរវាងមន្ត្រីការពារជាតិអាមេរិក និងចិន ក៏ដូចជាបញ្ឈប់កិច្ចសហប្រតិបត្តិការលើសុវត្ថិភាពដែនសមុទ្ររវាងប្រទេសទាំងពីរផងដែរ ។

ទន្ទឹមនោះ ក្រសួងការបរទេសក៏បាននិយាយផងដែរថា ប្រទេសចិនផ្អាកជាបណ្តោះអាសន្ននូវកិច្ចសហប្រតិបត្តិការជាមួយសហរដ្ឋអាមេរិកលើបញ្ហាដូចជា ការធ្វើមាតុភូមិនិវត្តន៍ជនចំណាកស្រុកខុសច្បាប់ ជំនួយផ្នែកតុលាការ ឧក្រិដ្ឋកម្មឆ្លងដែន និងការប្រែប្រួលអាកាសធាតុ ។

ស្របពេលជាមួយគ្នានេះ វាក៏កើតឡើង បន្ទាប់ពីសហរដ្ឋអាមេរិកបានកោះហៅឯកអគ្គរដ្ឋទូតចិនប្រចាំនៅទីក្រុងវ៉ាស៊ីនតោន លោក Qin Gang ដើម្បីតវ៉ាប្រឆាំងនឹង “សកម្មភាពដែលកំពុងកើនឡើង” របស់ទីក្រុងប៉េកាំងនៅជិតកោះតៃវ៉ាន់ផងដែរ ។

គួរបញ្ជាក់ថា ​លោកស្រី Pelosi បានធ្វើ​ដំណើរ​ទស្សនកិច្ចទៅកាន់​​តៃវ៉ាន់កាលពីយប់ថ្ងៃទី ២ ខែសីហា បើ​ទោះ​បី​ជា​ក្រុង​ប៉េកាំង​បាន​ព្រមាន​អំពី​ “ផលវិបាក​យ៉ាង​ធ្ងន់ធ្ងរ” ប្រសិន​បើ​អ្នក​នយោបាយ​ប្រជាធិបតេយ្យ​ជើង​ចាស់រូបនេះ​ធ្វើ​ដំណើរមកកោះនេះក៏ដោយ​ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អាមេរិក កោះហៅឯកអគ្គរដ្ឋទូត ចិន វិញ ចំពេលមានភាពតានតឹងនៅ តៃវ៉ាន់