UN៖ អន្តរជាតិត្រូវទទួលការអនុញ្ញាតឲ្យ ចូលទៅរោងចក្រនុយក្លេអ៊ែរធំបំផុតរបស់អឺរ៉ុប ក្រោយការបាញ់ផ្លោង

អគ្គលេខាធិការអង្គការសហប្រជាជាតិ (UN) លោក Antonio Guterres បានអំពាវនាវឲ្យអ្នកត្រួតពិនិត្យអន្តរជាតិ ត្រូវបានផ្តល់សិទ្ធិចូលទៅកាន់រោងចក្រនុយក្លេអ៊ែរ Zaporizhzhia បន្ទាប់ពីមានរបាយការណ៍ពីការបាញ់ផ្លោង។

អ៊ុយក្រែន និងរុស្ស៊ី បានចោទប្រកាន់គ្នាទៅវិញទៅមក ជុំវិញការវាយប្រហារកាលពីចុងសប្តាហ៍លើរោងចក្របរមាណូធំបំផុតរបស់អឺរ៉ុប។

លោក Guterres បាន​ប្រាប់​សន្និសីទ​សារព័ត៌មាន​ក្នុង​ប្រទេស​ជប៉ុន​ថា “រាល់​ការ​វាយ​ប្រហារ​ទៅ​លើ​រោងចក្រ​នុយក្លេអ៊ែរ​គឺ​ជា​រឿង​អត្តឃាត”។

អ៊ុយក្រែននិយាយថា ការបាញ់ផ្លោងជាថ្មីរបស់រុស្សី កាលពីថ្ងៃសៅរ៍ទី០៦ខែសីហា បានធ្វើឲ្យខូចឧបករណ៍ចាប់សញ្ញាវិទ្យុសកម្មចំនួនបី និងបណ្តាលឲ្យកម្មករម្នាក់រងរបួសនៅក្នុងរោងចក្រថាមពល Zaporizhzhia ដែលជាការវាយលុកលើកទីពីរក្នុងរយៈពេលប៉ុន្មានថ្ងៃជាប់ៗគ្នា។

ប្រធានាធិបតីអ៊ុយក្រែនលោក Volodymyr Zelensky បានចោទប្រកាន់រុស្ស៊ីថា កំពុងប្រព្រឹត្តអំពើភេរវកម្មនុយក្លេអ៊ែរ ហើយជំរុញឲ្យមានការដាក់ទណ្ឌកម្មអន្តរជាតិបន្ថែមទៀត ដោយលើកនេះត្រូវដាក់លើវិស័យនុយក្លេអ៊ែររបស់ទីក្រុងមូស្គូ ម្តង។

លោក Zelenskyy និយាយថា “គ្មានប្រទេសណានៅលើពិភពលោក ដែលអាចមានអារម្មណ៍ថាមានសុវត្ថិភាព នៅពេលដែលរដ្ឋភេរវករមួយបាញ់ដាក់រោងចក្រនុយក្លេអ៊ែរ នោះទេ”។

គួរបញ្ជាក់ថា កងកម្លាំងរុស្ស៊ីបានចាប់យករោងចក្រនៅភាគអាគ្នេយ៍ប្រទេសអ៊ុយក្រែនកាលពីដើមខែមីនា ប៉ុន្តែវានៅតែទទួលការមើលខុសត្រូវដោយអ្នកបច្ចេកទេសអ៊ុយក្រែនដដែល៕

ប្រែសម្រួល៖ Vann Vann

ប្រភព៖ Sky

ចុចអាន៖ ៧០% នៃអាវុធលោកខាងលិច ដែលបញ្ជូនទៅអ៊ុយក្រែន គឺមិនបានធ្លាក់ដល់ដៃកងទ័ពទេ