ព័ត៌មានជាតិ

ដំណាំធម្មជាតិ មានសារៈសំខាន់ទាក់ទងទៅនឹងអាហារូបត្ថម្ភ

បានផុស

២ years មុន

នៅ

ថ្ងៃអង្គារ ៩ សីហា ២០២២

ដោយ

ការបរិភោគបន្លែធម្មជាតិដែលដាំដោយមិនប្រើជីគីមី កំពុងមានការគាំទ្រពីអ្នកនៅទីក្រុងក៏ដូចជាអ្នកនៅខេត្តសៀមរាប និងបណ្ដាលខេត្តនានាទូទាំងប្រទេសផងដែរ។

នៅសមាគមកសិកម្មសុវត្ថិភាពធម្មជាតិ មានដាំបន្លែគ្រប់មុខមិនប្រើប្រាស់ជីគីមី។ ប្អូនប្រុស ហៃសីលា បានឲ្យដឹងថា ខ្ញុំដកស្ពៃមានចំនួន ១០-៣០ គីឡូ ហើយស្ពៃខ្ញុំមិនប្រើជីគីមីទេ គឺដាំដោយខ្លួនឯង គឺយើងដាំដាក់ជីធម្មជាតិ ដែលធ្វើពីលាមកសត្វ ជីកំប៉ុសគោក ជីកំប៉ុសទឹក។ ប្អូនប្រុសបញ្ជាក់ទៀតថា កាលណាស្ពៃដាំបានចំនួន ២៨ ថ្ងៃ គឺអាចប្រមូលផលបានហើយ។ យើងនឹងចាប់ផ្ដើមដកស្មៅចេញ ហើយអាចដាំបន្តទៅទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយឡែកអ្នកស្រី ថៃសូដា អនុប្រធានសមាគមកសិកម្មសុវត្ថិភាពធម្មជាតិ ភូមិជ្រៃខាងជើង ឃុំកៀនសង្កែ ស្រុកសូទ្រនិគម ខេត្តសៀមរាប បានរៀបរាប់ដែលថា នៅទីនេះកសិករយើងមានចំនួន ៦៧ គ្រួសារក្នុងការចូលជាសមាជិកនៅសមាគម ដាំបន្លែសុវត្ថិភាព។ បន្លែរបស់យើង ក៏មានការត្រួតពិនិត្យចាប់តាំងពីការដាំដុះដាក់ជីកំប៉ុស និងពេលដាំបានផល ហើយយើងក៏មានការវេចខ្ចប់មានអនាម័យ និងការត្រួតពិនិត្យត្រឹមត្រូវ។ អ្នកស្រីបញ្ជាក់ទៀតថា ការផ្គត់ផ្គង់បន្លែទៅដល់អតិថិជននានា គឺមានចាប់តាំងពីយើងចងក្រងជាក្រុម រហូតបង្កើតបានជាសមាគម ៨ ឆ្នាំហើយ ដែលមានការជ្រោមជ្រែងពីអង្គការ GRET និងអង្គការសៀដ។

អ្នកនាង ធឿន សុវណ្ណ រស់នៅក្នុងសហគមន៍ដាំបន្លែបានបញ្ជាក់ថា នៅក្នុងសហគមន៍របស់យើងមានដាំបន្លែស្លឹកចំនួន ៨៥% និងស្ពៃ សាឡាត់ ដែលដាំលើផ្ទៃដី ១ ហិចតា និងមានដាំនៅភូមិដើមរុន ឃុំតាយ៉ែក ដាំត្រសក់ ដំឡូង និងក្រឡាច លើផ្ទៃដី៣ ហិចតាទៀត។ អ្នកនាងបន្ថែមថា ពេលដែលបានផលហើយ យើងបាននាំយកបន្លែទាំងនោះទៅលក់នៅភ្នំពេញ ផ្សារសហគមន៍ខ្មែរ នៅខេត្តសៀមរាប និងមានផ្សារចុងសប្តាហ៍ផ្សារកសិកម្មខ្មែរទៀតផង។

កញ្ញា ចាស្ទីន ដែលជាមន្ត្រីទីផ្សារគម្រោង បានឲ្យដឹងថានៅក្នុង ៧ ឃុំនិង ៩ ភូមិ ក៏បានបង្ហាញពីវិធីសាស្ត្រ និងស្ថានភាពវិស័យកសិកម្មនៃការគ្រប់គ្រងធនធានធម្មជាតិអាហារូបត្ថម្ភ។ យើងក៏បានយកមកអនុវត្ត និងផ្សព្វផ្សាយនៅក្នុងសហគម ដើម្បីចូលរួមទាក់ទងទៅនឹងអាហារូបត្ថម្ភ ដើម្បីឲ្យប្រជាជនទទួលបាននូវចំណីអាហារគ្រប់គ្រាន់ នៅក្នុងគ្រួសាររបស់គាត់ក៏ដូចជាកូនរបស់ពួកគាត់ដែរ។

ដោយឡែកលោក ប៉ាត់សុវណ្ណជា មន្ត្រីគម្រោងបច្ចេកទេសកសិកម្មបញ្ជាក់ថា គម្រោងរបស់យើងដែលធ្វើនេះ គឺទាក់ទងទៅនឹងវិស័យកសិកម្ម ដែលអាចឈានទៅរកការបំពេញបន្ថែមលើការច្នៃប្រឌិតនៃអាហារូបត្ថម្ភ ដែលមុនដំបូងយើងត្រូវពង្រឹងសមត្ថភាពផលិតជីកំប៉ុស ដែលយើងគិតថាបានជួយទាំងបរិស្ថានជួយទាំងសេដ្ឋកិច្ចរបស់សង្គម តាមរយៈការកាត់បន្ថយការយកសំរាមទៅចាក់ចោលនៅគំនរសំរាម ហើយយើងអាចប្រមូលសំរាមយកមកធ្វើជីកំប៉ុសបានទៀតផង។

លោកបញ្ជាក់បន្ថែមថា នៅក្នុងការធ្វើកសិកម្មរបស់ប្រជាពលរដ្ឋក៏មានការដាំដុះបានរីកចម្រើនច្រើនរួមទាំងផ្ដល់ផលដំណាំដាំដុះ ដែលបានផ្ដល់នូវអាហារូបត្ថម្ភមានសុវត្ថិភាពដល់សុខភាពប្រជាជនថែមទៀតផង៕

អត្ថបទ៖ រុងរឿង

Related Topics:ដាំបន្លែធម្មជាតិ