ប្រេងសាំងធម្មតាបន្តចុះតម្លៃ ៤៦៥០រៀល និងម៉ាស៊ូត ៥០០០រៀល ក្នុងមួយលីត្រ

ចាប់តាំងពីចុងខែ កក្កដា រហូតមកដល់ដើមខែ សីហា នេះ តម្លៃប្រេងឥន្ធនៈលក់រាយនៅកម្ពុជា បន្តធ្លាក់ចុះ​តម្លៃជា​លំដាប់។ ក្នុងនោះ តម្លៃខ្ពស់បំផុតកាលពីចុងខែ កក្កដា កើនឡើងដល់ ៥៨០០រៀល សម្រាប់ប្រេងសាំងធម្មតា និងបានធ្លាក់ចុះមកវិញនៅ ៤៦៥០រៀល គិតត្រឹមថ្ងៃនេះ។

ជាក់ស្តែងក្រសួងពាណិជ្ជកម្ម បានប្រកាសនៅថ្ងៃទី ១១ ខែ សីហា នេះថា តម្លៃប្រេងសាំងធម្មតា លក់រាយក្នុង​សប្តាហ៍នេះ មានតម្លៃ ៤៦៥០រៀល និងប្រេងម៉ាស៊ូត ៥០០០រៀល ក្នុងមួយលីត្រ ដោយអនុវត្តចាប់ពីថ្ងៃ​ជូន​ដំណឹងនេះទៅ។

យោងតាមតម្លៃថ្មីនេះ មានន័យថា ប្រេងសាំងធម្មតា ចុះថ្លៃ ១០០រៀល ក្នុងមួយលីត្រ ខណៈប្រេងម៉ាស៊ូត ចុះថ្លៃ ១៥០រៀល។

ក្រុមហ៊ុនលក់រាយនៅកម្ពុជា ដែលនាំចូលប្រេងឥន្ធនៈ មានដូចជា ក្រុមហ៊ុនតេលា សូគីម៉ិច ប៉ាប៉ា សាវីម៉ិច លឹមឡុង និងក្រុមហ៊ុនមួយចំនួនទៀត។ ចំណែកក្រុមហ៊ុនបរទេស ដែលនាំចូលប្រេងឥន្ធនៈមកស្រុកខ្មែរ រួមមាន ក្រុមហ៊ុនតូតាល់ កាល់តិច និងក្រុមហ៊ុនភីធីធី។ នេះបើតាមការបញ្ជាក់របស់លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម។ លោកបន្ថែមថា ក្រសួងពាណិជ្ជកម្ម ចេញតម្លៃលក់រាយរៀងរាល់ ១០ថ្ងៃម្តង ដើម្បីឆ្លើយតបឱ្យទាន់និន្នាការនៃការប្រែ​ប្រួលថ្លៃប្រេងឥន្ធនៈនៅលើសកលលោក។

សូមបញ្ជាក់ថា បច្ចុប្បន្ន​នេះប្រេងឥន្ធនៈដែលកម្ពុជាប្រើប្រាស់ នាំចូលពីប្រទេសសិង្ហបុរី ថៃ និងវៀតណាម៕