រដ្ឋបាល់ទិកចំនួន ២ បន្ថយទំនាក់ទំនងជាមួយ ចិន ដោយសារលោកស្រី Pelosi

ប្រទេសឡាតវី និងអេស្តូនីបានដកខ្លួនចេញពីក្រុមកិច្ចសហប្រតិបត្តិការ 16+1 រវាងប្រទេសចិនជាមួយបណ្តាប្រទេសអឺរ៉ុបខាងកើត និងកណ្តាល ហើយវាក៏ត្រូវបានគេមើលឃើញថាជាការកាត់បន្ថយចំណងទំនាក់ទំនងជាមួយរដ្ឋាភិបាលទីក្រុងប៉េកាំងផងដែរ ។

ការដកខ្លួននេះធ្វើឡើង ចំពេលមានភាពតានតឹងលើកោះតៃវ៉ាន់ដែលបង្កឡើងដោយដំណើរទស្សនកិច្ចរបស់ប្រធានសភាអាមេរិកលោកស្រី Nancy Pelosi កាលពីដើមខែនេះ ដោយបណ្ដាលឲ្យប្រទេសចិនប្រកាសធ្វើសមយុទ្ធយោធាទ្រង់ទ្រាយធំ ក៏ដូចជាការដាក់ទណ្ឌកម្មលើប្រធានសភាអាមេរិករូបនេះផងដែរ ។

ពាក់ព័ន្ធនឹងដកខ្លួននេះដែរ ក្រសួងការបរទេសសហរដ្ឋអាមេរិកក៏បានស្វាគមន៍ការសម្រេចនេះ ដោយនិយាយថា “យើងគោរព និងគាំទ្រការសម្រេចចិត្តអធិបតេយ្យភាពរបស់អេស្តូនី និងឡាតវី ក្នុងការមិនចូលរួមក្នុងគំនិតផ្តួចផ្តើម 16+1” ។

ក្រសួងបញ្ជាក់ថា ការពង្រឹងទំនាក់ទំនងជាមួយដៃគូនៅអឺរ៉ុបគឺជា “សសរស្តម្ភនៃវិធីសាស្រ្តរបស់រដ្ឋបាលសហរដ្ឋអាមេរិកនេះ” ដើម្បីឆ្លើយតបទៅនឹងការសម្រេចចិត្តណាមួយរបស់ទីក្រុងប៉េកាំង ។

គួរបញ្ជាក់ថា ទម្រង់ 16+1 មានតាំងពីឆ្នាំ ២០១២ មកម្ល៉េះ គឺដើម្បីលើកកម្ពស់ហេដ្ឋារចនាសម្ព័ន្ធ និងគម្រោងអភិវឌ្ឍន៍រួមគ្នារវាងទីក្រុងប៉េកាំង និងរដ្ឋអឺរ៉ុប ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ មិនខុសពី អាមេរិក, ចិន គំរាមឆ្លើយតបសាហាវៗលើ លីទុយអានី ក្រោយក្រុមមន្ត្រីធ្វើដំណើរមក តៃវ៉ាន់