សន្តិសុខសង្គម

បុរសម្នាក់ស្លាប់ ខណៈជិះក្បូនឆ្លងទឹកស្ទឹងកំពុងជន់

បានផុស

៣ years មុន

នៅ

ថ្ងៃចន្ទ ២២ សីហា ២០២២

ដោយ

បុរសម្នាក់ដែលគេដឹងថាអត់ចេះហែលទឹក បានស្លាប់នៅក្នុងទឹកស្ទឹងដែលកំពុងជន់ ខណៈដែលជនរងគ្រោះនិងគ្នីគ្នាម្នាក់ទៀត កំពុងជិះក្បូនឆ្លងស្ទឹង ហើយត្រូវខ្សែកាត់ទទឹងស្ទឹងដាច់បណ្តាលឲ្យក្បូនក្រឡាប់តែម្តង។ ហេតុការណ៍នេះបានកើតឡើង នៅវេលាម៉ោង ១១ កាលពីថ្ងៃទី ២១ ខែសីហា ឆ្នាំ ២០២២ ត្រង់ចំណុចមាត់ស្ទឹង ក្នុងភូមិតាតោក ឃុំតាតោក ស្រុកសំឡូត ខេត្តបាត់ដំបង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមការរៀបរាប់ពីលោកមេប៉ុស្តិ៍ ទូច សម្បត្តិ បានបញ្ជាក់ថា នៅមុនពេលកើតហេតុ គឺជនរងគ្រោះឈ្មោះ វុទ្ធ សាវង់ ភេទប្រុស អាយុ ២២ ឆ្នាំ ជាមួយនិងអ្នកភូមិម្នាក់ទៀត បាននាំគ្នាជិះក្បូនដើម្បីឆ្លងស្ទឹងទៅត្រើយម្ខាង ( ក្បូនធ្វើអំពីបន្ទះក្តារក្រាលពីលើប៊ីដុងជ័រ) ។ លោកមេប៉ុស្តិ៍បានបន្តថា ខណៈដែលពួកគេកំពុងទាញខ្សែដែលឆ្លងកាត់ទទឹងស្ទឹង ដើម្បីឲ្យក្បូនលូនទៅមុខ ស្រាប់តែខ្សែដែលអូសកាត់ស្ទឹងបានដាច់ ធ្វើឲ្យក្បូនត្រូវទឹកជំនន់វាយឲ្យក្រឡាប់តែម្តង ដោយម្នាក់បានតោងប៊ីដុងជាប់ ឯជនរងគ្រោះមិនមានអ្វីតោងទេ ម្យ៉ាងគេក៏មិនចេះហែលទឹកទៀត ទើបធ្វើឲ្យលិចបាត់ទៅក្នុងទឹកស្ទឹងដែលកំពុងជន់នោះតែម្តង។

ទីបំផុតប្រជាពលរដ្ឋដែលនាំគ្នាមុជរាវរក និងប្រើសំណាញ់ ក៏បានប្រទះឃើញសពជនរងគ្រោះនៅវេលាម៉ោង ៥ និង ៣០ នាទីល្ងាចថ្ងៃដដែល សមត្ថកិច្ចក៏បានប្រគល់សពទៅឲ្យក្រុមគ្រួសារនាំយកទៅធ្វើបុណ្យតាមប្រពៃណីហើយ៕