លោកជំទាវ ម៉ែន សំអន ៖ សម្តេចតេជោ និងសម្តេចកិត្តិព្រឹទ្ធបណ្ឌិត តែងតែយកចិត្តទុកដាក់បំផុតមិនទុក្ខឲ្យនរណាម្នាក់ស្លាប់ដោយអត់អាហារឡើយ

លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងជាប្រធានសមាគមនារីកម្ពុជា ដើម្បីសន្តិភាព និងអភិវឌ្ឍន៍ បានថ្លែងថា សម្តេចតេជោហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា តែងតែយកចិត្តទុកដាក់បំផុត ដោយមិនទុក្ខឲ្យនរណាម្នាក់ស្លាប់ ដោយអត់អាហារឡើយ ជាពិសេសកុមារកំព្រាតែម្ដង ទោះនៅជនបទដាច់ស្រយ៉ាលយ៉ាងណាក្តី។

លោកជំទាវ ម៉ែន សំអន ថ្លែងបែបនេះ ខណៈអញ្ជើញជួបសំណេះសំណាល និងចែកអំណោយជូនកុមារកំព្រា និងប្រជាពលរដ្ឋចំនួន ៣០០នាក់ ស្ថិតនៅខណ្ឌមានជ័យ រាជធានីភ្នំពេញ ដែលពិធីបានរៀបចំនៅវត្តចាក់អង្រែលើ នាព្រឹកថ្ងៃទី ២២ ខែសីហា ឆ្នាំ ២០២២នេះ។

​នៅក្នុងឱកាសនោះ លោកជំទាវ បាននាំយកសេចក្តីនឹករលឹក និងការសាកសួរសុខទុក្ខពីសម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់អង្គពិធីទាំងមូលនូវក្តីនឹករលឹក និងការគិតគូរអំពីសុខទុក្ខប្រជាពលរដ្ឋ នៅទូទាំងប្រទេស។

លោកជំទាវ ម៉ែន សំអន បានលើកឡើងថា ក្រោមការដឹកនាំប្រកបដោយកិត្តិបណ្ឌិត របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានធ្វើឲ្យប្រទេសជាតិមានសុខសន្តិភាពពេញបរិបូណ៍ មានការអភិវឌ្ឍសង្គមសេដ្ឋកិច្ចយ៉ាង លឿន ផ្តល់ឱកាស និងសិទ្ធិសេរីភាពដល់ប្រជាពលរដ្ឋ ក្នុងការប្រកបមុខរបរនានា មានជីវភាពរស់នៅកាន់តែប្រសើរជាលំដាប់ ដែលបានអនុញ្ញាតឲ្យយើងទាំងអស់គ្នាបានជួបជុំសំណេះសំណាលគ្នា នាពេលនេះ។

លោកជំទាវ ក៏បានក្រើនរំលឹកដល់ក្មួយៗកុមារកំព្រាទាំងអស់ថា ថ្វីត្បិតតែយើងកំព្រា កុំបាក់ទឹកចិត្ត កុំគិតថាយើងឯកោរ សូមក្មួយៗគិតថានៅមានការថែទាំពីសំណាក់ លោកគ្រូ អ្នកគ្រូ ជាពិសេសការយកចិត្តទុក្ខដាក់ពីសំណាក់សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដោយមិនបានទុកឲ្យនរណាម្នាក់ស្លាប់ដោយអត់អាហារនោះទេ។

លោកជំទាវ ក៏បានផ្តាំផ្ញើដល់កុមារទាំងអស់ត្រូវថែទាំសុខភាព ជាពិសេសគោរពតាមវិធានការសុខាភិបាល ៣ការពារ ៣កុំ ដើម្បីជៀសផុតពីជំងឺឆ្លងផ្សេងៗ ជៀសឲ្យឆ្ងាយពីគ្រឿងញៀន សារធាតុញៀនផ្សេងៗ ត្រូវខិតខំរៀនសូត្រ ស្តាប់តាមការណែនាំរបស់លោកគ្រូ អ្នកគ្រូ បង្កើនចំណេះដឹង បង្កើនជំនាញការងារ ដើម្បើចិញ្ចឹមជីវិត និងអភិវឌ្ឍន៍សមត្ថភាពរបស់ខ្លួន ឲ្យក្លាយក្លាយជាទំពាំងស្នងឬស្សី និងក្លាយជាយុវជនគំរូ ដើម្បីចូលរួមចំណែកជាមួយរាជរដ្ឋាភិបាល ក្នុងការអភិវឌ្ឍប្រទេសជាតិ ឲ្យកាន់តែមានភាពរីកចម្រើនបន្ថែមទៀត។

អំណោយដែល ៣០០នាក់ ទទួលបានក្នុងថ្ងៃនេះ រួមមាន៖ 

១. មណ្ឌលកុមារកំព្រាភ្នំពេញថ្មី និងមជ្ឈមណ្ឌលកូលាបទី៤ ចំនួន ២០០នាក់ ទទួលបាន អង្ករ ១.០០០គីឡូក្រាម, មី ២០កេស, ទឹកត្រី ១០យួរ, ទឹកស៊ីអីវ ១០យួរ, ទឹកសុទ្ធ ២០កេស, ម៉ាស ១កេស, ភេសជ្ជៈ ១០កេស ថវិកា ២លានរៀល ។

២. កុមារនៅក្នុងសហគមន៍នៃសំណង់មិនរៀបរយ សង្កាត់ចាក់អង្រែលើ ចំនួន ១០០នាក់ ទទួលបាន អង្ករ ៥០០ គីឡូ ក្រាម, មី ២០កេស, ទឹកត្រី ១០យួរ, ទឹកស៊ីអីវ ១០យួរ, ទឹកសុទ្ធ ២០កេស, ម៉ាស ១កេស, ភេសជ្ជៈ ៥កេស ថវិកា ២ លានរៀល ។

៣. ចំណែកឯ អ្នកចូលរួម ៣០០នាក់ ក៏ទទួលបានការឧបត្ថម្ភជាថវិកាពីសំណាក់ លោក អៀង ពិសិដ្ឋ អគ្គនាយកក្រុមហ៊ុន RITHYSETH DEVELOPMENT ក្នុងម្នាក់ៗថវិកា ៣ម៉ឺនរៀល៕

អត្ថបទ៖ វិមាន