ម៉ាល់ឌីវ មើលឃើញពីសក្ដានុពល កម្ពុជា ជាពិសេសលើវិស័យចំណីអាហារ

រដ្ឋមន្ត្រីការបរទេស នៃសាធារណរដ្ឋម៉ាល់ឌីវ មើលឃើញពីសក្ដានុពលនៅកម្ពុជា ដែលប្រទេសទាំងពីរ អាចធ្វើកិច្ចសហប្រតិបត្តិការពាណិជ្ជកម្មជាមួយគ្នាបាន ជាពិសេសលើវិស័យចំណីអាហារ។

លោក អាប់ឌូឡា សាហ៊ីដ (Abdulla SHAHID) ប្រធានមហាសន្និបាតអង្គការសហប្រជាជាតិ (អ.ស.ប) លើកទី៧៦ និងជារដ្ឋមន្ត្រីការបរទេស នៃសាធារណរដ្ឋម៉ាល់ឌីវ បានថ្លែងទៅកាន់សម្តេចតេជោ ហ៊ុន សែន នៅក្នុងជំនួបពិភាក្សាការ​ងារ​​ថ្ងៃទី ២២ ខែ សីហា ថា កម្ពុជា ទទួលបានការអភិវឌ្ឍយ៉ាងឆាប់រហ័ស ជាក់ស្តែងដូចជា ទីក្រុងភ្នំពេញ រីក​ចម្រើនខ្លាំង ដូចជារាជធានីនាប្រទេសដទៃទៀត ដែលជាប្រទេសអភិវឌ្ឍន៍ក្នុងពិភពលោក។ លោក ក៏បានវាយតម្លៃខ្ពស់​ចំពោះ​ប្រទេសកម្ពុជា ដែលបានប្ដេជ្ញាចិត្តនាំប្រទេស ទៅជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ នឹងក្លាយទៅជាប្រទេសដែលមាន​ប្រាក់ចំណូលកម្រិតខ្ពស់នៅឆ្នាំ២០៥០។

រដ្ឋមន្ត្រីការបរទេស នៃសាធារណរដ្ឋម៉ាល់ឌីវ ​បានសង្កេតឃើញពីសក្ដានុពលនៅកម្ពុជា ដែលមានប្រភពចំណីអាហារ អាចនាំចេញទៅប្រទេសម៉ាល់ឌីវបាន។ លោកសង្កត់ធ្ងន់ថា ម៉ាល់ឌីវ នឹងសហការជាមួយក្រសួងការបរទេសកម្ពុជា និងជំរុញអ្នកវិនិយោគម៉ាឌីវ ឱ្យពិនិត្យមើលការវិនិយោគនៅក្នុងព្រះរាជាណាចក្រកម្ពុជា ដើម្បីជំរុញទំហំ​ពាណិជ្ជកម្មរវាង​ប្រទេស​ទាំងពីរឲ្យកាន់តែធំធាត់ឡើងថែមទៀត។

ជាការឆ្លើយតប សម្ដេចតេជោ ហ៊ុន សែន ​ឯកភាពចំពោះបំណងចង់បង្កើនកិច្ចសហប្រតិបត្តិការវិស័យពាណិជ្ជកម្មរវាង​ប្រទេសទាំងពីរបន្ថែមទៀត។

ទន្ទឹមនឹងនេះ សម្តេចតេជោ ក៏ចង់ឱ្យលោក អាប់ឌូឡា សាហ៊ីដ សិក្សាអំពីភាពអនុគ្រោះនៃការវិនិយោគនៅកម្ពុជា ជាពិសេសនៅ​លើវិស័យ​កសិកម្ម។ សម្ដេចបានមានប្រសាសន៍ថា កម្ពុជា បានអនុញ្ញាតឱ្យជនបរទេសមកបណ្ដាក់ទុន​១០០% ជាពិសេស នៅក្នុងការដាក់ទុនលើវិស័យកសិកម្ម ដូចជាការដាក់ម៉ាស៊ីនកិនស្រូវ, ការវិនិយោគទៅលើឃ្លាំង​ស្តុកស្រូវ និងការប្រមូលទិញស្រូវផ្ទាល់ពីកសិករ ដើម្បីកិន ហើយសម្រាប់នាំចេញទៅប្រទេសដទៃ។ ក្នុងន័យនេះ សម្ដេចតេជោ នាយករដ្ឋមន្ត្រី បានស្នើសុំឱ្យឯកឧត្តម លើកទឹកចិត្តឱ្យអ្នកវិនិយោគម៉ាល់ឌីវ ពិនិត្យលើការវិនិយោគ​លើកសិផល​ស្រូវ-អង្ករ សម្រាប់ការនាំចេញទៅប្រទេសម៉ាឌីវផ្ទាល់៕