ឆើត ឆាយ ថា លេងកំប្លែងជាង១០ឆ្នាំមិនល្បី មក​ល្បីរឿងគេចោទបោកលុយ៣៥០ដុល្លារ

ថ្មីៗនេះអ្នកគាំទ្រ និងប្រើប្រាស់បណ្តាញសង្គមហ្វេសប៊ុកហាក់មានការភ្ញាក់ផ្អើល ខណ:សុខៗអតីតតារាកំប្លែង ឆើត ឆាយ​ ត្រូវបានគេចែករំលែកថា មានជាប់ពាក់ព័ន្ធនឹងរឿងជំពាល់លុយគេមិនសង ។

បន្ទាប់ពីកើតមានរឿងរ៉ាវនេះឡើង តារាកំប្លែង ឆើត ឆាយ កន្លងមកក៏បានចេញមុខបកស្រាយដោយធ្វើការបដិសេធម្តងរួចមកហើយ ថានាងត្រូវគេប្រើវិធីឆបោកដើម្បីចោទប្រកាន់មកលើខ្លួនទាំងដែលនាងអត់បានដឹងរឿងអ្វីបន្តិចសោះ។ ឆើត ឆាយ បន្តថា ខ្លួនពុំបានជាប់ពាក់ព័ន្ធនឹងរឿងលុយកាក់ជាមួយបុគ្គលណាឡើយ ហើយបញ្ហានេះដោយសារមានជន ខិលខូច​ដែលបានបង្ខូចនាងរឿងឆបោកខ្ចីលុយ។

ថ្វីត្បិតមានការបកស្រាយពីសាមីខ្លួន ឆើត ឆាយ ដូចខាងលើក្តី តែមានមតិខ្លះទៀតហាក់យល់ច្រឡំចំពោះរឿងនេះជាថ្មីម្តងទៀត តារាកំប្លែងរូបនេះបានសម្តែងការហួសចិត្តដោយលើកឡើងថា ខ្លួនលេងកំប្លែង១០ឆ្នាំជាងអត់ល្បីតែមកល្បីត្រឹមមកចោទឯងបោកលុយគេ៣៥០ដុល្លារ។

ពាក់ព័ន្ធបញ្ហាខាងលើនេះដែរនៅរសៀលថ្ងៃទី២៣ ខែសីហា ឆ្នាំ២០២២ កម្ពុជាថ្មី មិនទាន់អាចទាក់ទងដើម្បីស្វែងរកការសួរនាំបន្ថែមពីតារាកំប្លែង ឆើត ឆាយ បាននៅឡើយទេ៕

អត្ថបទ៖ ចាន់រ៉ា