រដ្ឋបាលរាជធានីភ្នំពេញ បើកដំណើរការសាងសង់អគាររដ្ឋបាលថ្មី សម្រាប់បម្រើសេវាសាធារណៈ

រដ្ឋបាលរាជធានីភ្នំពេញ បើកដំណើរការសាងសង់អគាររដ្ឋបាល ក្នុងបរិវេណសាលារាជធានីភ្នំពេញ ដើម្បីបម្រើតម្រូវការជាក់ស្តែងក្នុងការបម្រើសេវាសាធារណៈជូនប្រជាពលរដ្ឋ​ឲ្យកាន់តែមានប្រសិទ្ធភាពថែមទៀត ហើយអគាររដ្ឋបាលថ្មីនេះ នឹងប្រើរយៈពេលជាង៦ខែដើម្បីសាងសង់។

ពិធីក្រុងពាលីតាមបែបសាសនាត្រូវបានធ្វើឡើងនាព្រឹកថ្ងៃទី២៤ ខែសីហា ឆ្នាំ២០២២ ក្រោមអធិបតីភាពលោក ឃួង ស្រេង អភិបាលរាជធានីភ្នំពេញ និងលោកស្រី ជាសីណា ឃួង ស្រេង។ ដំណើរការសាងសង់អគារនេះប្រព្រឹត្តទៅស្របតាមសេចក្តីត្រូវការផ្នែករដ្ឋបាលរាជធានីភ្នំពេញ និងបម្រើប្រជាពលរដ្ឋដែលមកសុំសេវា។

ពិធីក្រុងពាលីនេះ ធ្វើឡើងដើម្បីសុំម្ចាស់ទឹកម្ចាស់ដី និងសេចក្តីសុខសេចក្តីចម្រើនតាមបែបសាសនា បើកការសាងសង់អគារនេះចាប់ពីពេលនេះតទៅក្នុងគម្រោងឲ្យរួចរាល់ រយៈពេល​ជាង៦ខែ ។

នេះគឺជាការគិតគូ និងយកចិត្តទុកដាក់ពីលោក ឃួង ស្រេង ក្នុងការរៀបចំឲ្យមន្រ្តីមានកន្លែងធ្វើការសមរម្យ ងាយស្រួលបម្រើសេវាជូនប្រជាពលរដ្ឋ ជាពិសេសស្របពេល​ដែល​រាជធានីភ្នំពេញ​ កំពុងមានការអភិវឌ្ឍលើគ្របវិស័យ និងការអភិវឌ្ឍហេដ្ឋារចនាសម្ព័ន្ធ និងប្រជាពលរដ្ឋក្នុងរាជធានីភ្នំពេញ មានការកើនឡើងជាលំដាប់ ក្នុងបរិបទនៃការរីកចម្រើន  និងសុខសន្តិភាពពេញផ្ទៃប្រទេស ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា៕

អត្ថបទ៖ ស្រីរ័ត្ន