សុវត្ថិ ឌីធារិកា ប្រាប់ពីមូលហេតុដែលធ្វើបុណ្យ​ខួប១០០ថ្ងៃជូនឪពុក-ម្តាយ តែមួយព្រឹក

គិតមកដល់ពេលនេះ លោកឪពុកនិងអ្នកម្តាយជាទីស្រលាញ់របស់តារាចម្រៀង សុវត្ថិ ឌីធារិកា បានចែកឋានទៅមានរយ:១០០ថ្ងៃហើយ ខណ: សុវត្ថិ ឌីធារិកា ក៏បានរៀបចំពិធីបុណ្យគម្រប់ខួប១០០ ដើម្បីឧទ្ទិស កុសកដល់អ្នកមានគុណទាំង២ផងដែរ។

បើតាមការបញ្ជាក់ឲ្យដឹងពីតារាស្រី សុវត្ថិ ឌីធារិកា បាននិយាយថា ពិធីបុណ្យគម្រប់ខួប១០០ដើម្បីឧទ្ទិសកុសកដល់អ្នកមានគុណទាំង២របស់នាង គឺបានបញ្ចប់កាលពីព្រឹកថ្ងៃទី២៥ ខែសីហា ឆ្នាំ២០២២។ ប៉ុន្តែសម្រាប់ពិធីបុណ្យ១០០ថ្ងៃនេះ មិនបានរៀបចំឡើងធំដុំទេ ពោលគឺធ្វើជាលក្ខណ:គ្រួសារតែមួយព្រឹកប៉ុណ្ណោះ។

កញ្ញា សុវត្ថិ ឌីធារិកា បានបន្តទៀតថា មូលហេតុដែលនាងធ្វើពិធីបុណ្យ១០០ថ្ងៃជូនលោកឪពុកអ្នកម្តាយមិនមានលក្ខណ:ធំដុំនេះ ក៏ព្រោះមិនចង់រំខានពេលវេលាដល់បងប្អូន និងមិត្តភក្តិទាំងអស់គ្នា។ សុវត្ថិ ឌីធារិកា បានថ្លែងដូច្នេះថា «ខ្ញុំសូមអរគុណ និងអធ្យាស្រ័យដល់អ៊ុំ ពូមីង ប្អូនញាតិមិត្តទាំងអស់ ដែលបានអញើញចូលរួមពិធីបុណ្យ១០០ថ្ងៃរបស់ប៉ាម៉ាក់ខ្ញុំ ដែលបានបញ្ចប់ដោយរលូន»។

តារាចម្រៀង សុវត្ថិ ឌីធារិកា បានបន្តថា ខ្ញុំសូមអភ័យទោសចំពោះបងប្អូនញាតិមិត្តទាំងអស់ដែលនាងខ្ញុំមិនបានអញើញ និងជំរាបបុណ្យពីព្រោះនាងខ្ញុំធ្វើជាលក្ខណៈគ្រួសារតែមួយព្រឹក និងមិនហ៊ានរំខានបងប្អូនដែល​ស្រលាញ់​រាប់អានច្រើននោះទេ។ ខ្ញុំពិតជាអរគុណខ្លាំងណាស់សន្ដានចិត្តអាណិតស្រលាញ់របស់បងប្អូន និងភ្ញៀវកិត្តិយសដែលអញើញចូលរួមពិធីបុណ្យ១០០ថ្ងៃ។

គួរបញ្ជាក់ថា កាលពីថ្ងៃទី១៧ ខែឧសភា ឆ្នាំ២០២២ តារាចម្រៀងស្រី សុវត្ថិ ឌីធារីកា មានទុក្ខជាទម្ងន់ដោយសារតែលោកឪពុក និងអ្នកម្ដាយជាទីស្រលាញ់ត្រូវបាត់បង់ជីវិតព្រមគ្នាក្នុងហេតុការណ៍ក្រឡាប់រថយន្ត​នៅស្រុកឆែប ខេត្តព្រះវិហារ។ ដំណឹងនេះបានធ្វើឲ្យអ្នកគាំទ្រ និងមិត្តភក្តិរួមអាជីពសិល្ប:ជាច្រើនបង្ហាញការចូលរួមរំលែកទុក្ខ និងរន្ធត់ចិត្តខ្លាំងនូវការបាត់បង់ដ៏ធំធេង គឺឪពុកនិងអ្នកម្តាយ សុវត្ថិ ឌីធារិកា ដោយគ្មាន​ថ្ងៃវិលត្រឡប់៕

អត្ថបទ៖ ចាន់រ៉ា