អភិបាលរាជធានី​ណែនាំ​ឱ្យមន្ត្រីជំនាញ​ និងអាជ្ញាធរ​ដែនដីរៀបជួសជុលមើលថែទាំផ្លូវឱ្យបានល្អ

អភិបាលនៃគណៈអភិបាលរាជធានីភ្នំពេញ លោកឃួង ស្រេង នៅព្រឹកថ្ងៃទី ២៩ ខែសីហា ឆ្នាំ ២០២២នេះ​ បានធ្វើការណែនាំឱ្យមន្ត្រីជំនាញ និងអាជ្ញាធរដែលដី រៀបចំសណ្តាប់​ធ្នាប់សាធារណៈ ​និងជួសជុលមើលថែផ្លូវឱ្យបានល្អដើម្បីឱ្យបងប្អូនប្រជាពលរដ្ឋអាចធ្វើដំណើរបានស្រួល។

នៅក្នុងឱកាស​ដឹកនាំ មន្ត្រីជំនាញ​និងអាជ្ញាធរដែលដី ចុះរៀបចំសណ្តាប់ធ្នាប់សាធារណៈ​និងមើលការជួសជុលផ្លូវជាតិលេខ២ ក្នុងសង្កាត់ចាក់សង្រែលើនិងអង្រែក្រោម លោក ឃួង ស្រេង បានជំរុញឱ្យមន្ត្រីជំនាញ និងអាជ្ញាធរខណ្ឌមានន័យជួសជុល ជង្ហុកសំបុកមាន់​ រៀបចំសណ្តាប់​ធ្នាក់ឱ្យបានល្អប្រសើរ ពិសេសកុំមានការលក់ដូររំលោភ យកចិញ្ចើមផ្លូវសាធារណៈ។

​សូមជំរាបថា ​រដ្ឋបាលរាជធានីភ្នំពេញបានសម្រេចបិទកំណាត់មហាវិថីសម្តេចតេជោ ហ៊ុន សែន ហៅ (ផ្លូវ៦០ម៉ែត្រ) នៅសង្កាត់ចាក់អង្រែលើ ខណ្ឌមានជ័យ ក្នុងរយៈពេល៣ថ្ងៃចាប់​ពីថ្ងៃទី ​២៩ ដល់ថ្ងៃទី ៣១ សីហា ឆ្នាំ២០២២ ដើម្បីរៀបចំពិធីបើកការដ្ឋានសាងសង់ស្ពាន​អាកាស​នៅចំណុចប្រសព្វមហាវិថីសម្ដេចតេជោ ហ៊ុន សែន មហាវិថីព្រះមុនីវង្សជាមួយនឹងវិថីកងយោធ​ពលខេមរភូមិន្ទ (ផ្លូវលេខ២៧១) និងសាងសង់ស្ពានអាកាសនៅចំណុចប្រសព្វមហាវិថីសហព័ន្ធរុស្ស៊ី ជាមួយនឹងមហាវិថីសម្តេចចៅហ្វាវាំងវរវៀងជ័យអធិបតីស្រឹង្គារ គង់ សំបុល (ផ្លូវលេខ២០០៤) ក្រោមអធិបតីភាពរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា៕

អត្ថបទ៖ ស្រីរ័ត្ន