កីឡា

Pogba អះអាងថា បងប្រុសរបស់ខ្លួន និងក្រុមអន្ធពាល បានប៉ុនប៉ងជំរិតប្រាក់ ១១ លានផោន

បានផុស

២ years មុន

នៅ

ថ្ងៃចន្ទ ២៩ សីហា ២០២២

ដោយ

Paul Pogba អតីតកីឡាកររបស់ក្លិប Manchester United បានចេញសេចក្តីថ្លែងការណ៍មួយ ដោយបានចោទប្រកាន់បងប្រុសរបស់ខ្លួន Mathias Pogba គឺជាផ្នែកមួយនៃ “ការប៉ុនប៉ងជំរិតទារប្រាក់ដែលរៀបចំដោយក្រុមអន្ធពាល”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍ដែលចុះហត្ថលេខាដោយមេធាវីរបស់ខ្លួន ម្តាយរបស់គេ Yeo Moriba និងភ្នាក់ងារបច្ចុប្បន្ន Rafaela Pimenta បាននិយាយថា វីដេអូដែលបានផ្សព្វផ្សាយកាលពីយប់ថ្ងៃសៅរ៍ ដោយសេចក្តីថ្លែងការណ៍នោះបានអានថា “ពួកគេបន្ថែមពីលើការគំរាមកំហែង និងការប៉ុនប៉ងជំរិតទារប្រាក់ដោយក្រុមឧក្រិដ្ឋជន ដែលបានរៀបចំប្រឆាំងនឹង Paul Pogba”។

“ស្ថាប័នមានសមត្ថកិច្ចនៅក្នុងប្រទេសអ៊ីតាលី និងបារាំងត្រូវបានជូនដំណឹងកាលពីមួយខែមុន ហើយនឹងមិនមានការអត្ថាធិប្បាយណាមួយបន្ថែមទៀត ទាក់ទងនឹងការស៊ើបអង្កេតដែលកំពុងបន្តនោះទេ។”

Mathias Pogba វ័យ ៣២ ឆ្នាំ បានបង្ហោះវីដេអូជាបួនភាសាចំណងជើងថា “ការលាតត្រដាងដ៏អស្ចារ្យ” អំពីប្អូនប្រុសរបស់ខ្លួន Paul Pogba និងភ្នាក់ងាររបស់គេ Rafaela Pimenta ដែលបានចូលកាន់តំណែងជាប្រធានក្រុមហ៊ុនរបស់អតីតភ្នាក់ងារ Mino Raiola ដែលបានស្លាប់កាលពីខែមេសា។

គេបាននិយាយថា “ពិភពលោកទាំងមូល ក៏ដូចជាអ្នកគាំទ្ររបស់ប្អូនប្រុសខ្ញុំ និងលើសពីនេះទៅទៀត ក្រុមជម្រើសជាតិបារាំង ក៏ដូចជា Juventus មិត្តរួមក្រុមរបស់ប្អូនប្រុសខ្ញុំ និងអ្នកឧបត្ថម្ភរបស់គាត់គួរតែដឹងរឿងជាក់លាក់មួយ”។ កីឡាករបាល់ទាត់អាជីពផងដែររូបនេះ បាននិយាយថា មនុស្សត្រូវដឹងពីអ្វីដែលគេបានដឹង ដើម្បីវិនិច្ឆ័យថាតើប្អូនប្រុសរបស់ខ្លួនសមនឹងទទួលបានតំណែងនៅក្នុងក្រុមជម្រើសជាតិបារាំង និងកិត្តិយសក្នុងការលេងពាន World Cup។ «អ្វីៗទាំងអស់នេះទំនងជានឹងបែកធ្លាយ» Mathias Pogba បានបញ្ចប់ដោយមិនបាននិយាយអ្វីបន្ថែមទៅក្នុងវីដេអូ “ការលាតត្រដាងដ៏អស្ចារ្យ” របស់គេ។

យោងតាមប្រភពពីរដែលជិតស្និទ្ធនឹងគ្រួសារ Pogba ដែលត្រូវបានទាក់ទងដោយ AFP ចំនួនទឹកប្រាក់ដ៏ច្រើនកំពុងត្រូវបានទាមទារពី Paul Pogba ប្រសិនបើគាត់ចង់ជៀសវាងការផ្សព្វផ្សាយវីដេអូដែលបែកធ្លាយនោះ។

Paul Pogba ដែលបានឈ្នះពាន World Cup ជាមួយប្រទេសបារាំងក្នុងឆ្នាំ ២០១៨ បានត្រលប់មក Juventus វិញដោយគ្មានតម្លៃផ្ទេរនៅរដូវក្តៅនេះ បន្ទាប់ពីចំណាយរយៈពេល ៦ ឆ្នាំនៅ Manchester United ហើយបច្ចុប្បន្នកំពុងសម្រាកព្យាបាលរបួសជង្គង់។ កីឡាករវ័យ ២៩ ឆ្នាំរូបនេះត្រូវបានគេរំពឹងថានឹងត្រលប់មកលេងវិញនៅខែក្រោយ៕

អត្ថបទ៖ មន្នីរ័ត្ន