កីឡា

កីឡាការិនីខ្មែរ-អាមេរិក Cassandre ឈ្នះមេដាយប្រាក់១នៅ Costa Rica Open

បានផុស

២ years មុន

នៅ

ថ្ងៃចន្ទ ២៩ សីហា ២០២២

ដោយ

កីឡាការិនីតេក្វាន់ដូជម្រើសជាតិកម្ពុជា Casandre Nicole Tubbs បានឈ្នះមេដាយប្រាក់១គ្រឿងក្នុងការប្រកួតតេក្វាន់ដូលំដាប់ពិភពលោក Costa Rica Taekwondo Open ដែលទើបបញ្ចប់ទៅកាលពីថ្ងៃទី២៨ ខែសីហាកន្លងទៅនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាការិនីខ្មែរ-អាមេរិក Cassandre បានប្រកួតក្នុងវិញ្ញាសាទម្ងន់ក្រោម -៦២គីឡូក្រាមដែលមានបេក្ខនារីចំនួន១៦រូបមកពីបណ្តាប្រទេសផ្សេងជុំវិញពិភពលោក។ នៅវគ្គ១៦រូបដំបូង កីឡាការិនីខ្មែរ-អាមេរិករូបនេះចាប់ឆ្នោតចំគ្មានដៃគូប្រកួត ដូច្នេះនាងបានឡើងទៅវគ្គ៨រូបចុងក្រោយដោយស្វ័យប្រវត្តិ។

នៅវគ្គ៨រូបចុងក្រោយ Cassandre បានប្រកួតឈ្នះកីឡាការិនីអាហ្សង់ទីន Kifer Victoria ដោយពិន្ទុ ០-២ មុនពេលឡើងទៅទម្លាក់កីឡាការិនីអាមេរិក Morales Britney នៅវគ្គពាក់កណ្តាលផ្តាច់ព្រ័ត្រដោយពន្ទុ ២-០ ដើម្បីឡើងទៅវគ្គដណ្តើមមេដាយមាស។

នៅវគ្គផ្តាច់ព្រ័ត្រដើម្បីដណ្តើមមេដាយមាស កីឡាការិនីកម្ពុជារូបនេះបានចាញ់កីឡាការិនីម៉ិកស៊ិក Velazquez Itzel ដោយពិន្ទុ ២-០ ដើម្បីទទួលបានមេដាយប្រាក់ ខណៈកីឡាការិនីម៉ិកស៊ិកទទួលបានមេដាយមាស ហើយកីឡាការិនីអាមេរិក Morales Britney ទទួលបានមេដាយសំរឹទ្ធ និងកីឡាការិនីកូស្តារីកា Vargas Nicole ទទួលបានមេដាយសំរឹទ្ធស្ទួន។

សូមបញ្ជាក់ថា ព្រឹត្តិការណ៍ប្រកួតតេក្វាន់ដូលំដាប់ពិភពលោក Costa Rica Taekwondo Open ចាប់ពីថ្ងៃទី២៥ ដល់ទី២៨ ខែសីហា ឆ្នាំ២០២២ នៅប្រទេសកូស្តារីកា។ ការប្រកួតនេះប្រជុំដោយកីឡាករ កីឡាការិនីតេក្វាន់ដូលំដាប់ពិភពលោកដែលភាគច្រើនមកពីអាមេរិក អាមេរិកខាងជើង និងអឺរ៉ុបចូលរួមប្រកួត។ ក្នុងព្រឹត្តិការណ៍ខាងលើនេះកាលពីឆ្នាំ២០២០ Cassandre ឈ្នះបានមេដាយសំរឹទ្ធ១គ្រឿង។

កាលព្រឹត្តិការណ៍កីឡាស៊ីហ្គេម ឆ្នាំ២០២១ (លើកមកឆ្នាំ២០២) នៅប្រទេសវៀតណាម កាលពីប៉ុន្មានខែមុន កីឡាការិនី Casandre ឈ្នះបានមេដាយសំរឹទ្ធ១គ្រឿង៕

អត្ថបទ៖ វីរបុត្រ