ប្រទេស ១៣០ នៅលើពិភពលោក អាចមើលឃើញការផ្សាយរបស់ទូរទស្សន៍ជាតិកម្ពុជា (ទទក)

មន្ត្រីជាន់ខ្ពស់ក្រសួងព័ត៌មាន បានឲ្យដឹងថា ប្រទេសនៅលើពិភពលោកចំនួន ១៣០ប្រទេស អាចមើលឃើញការផ្សាយរបស់ស្ថានីយ៍ទូរទស្សន៍ជាតិកម្ពុជា (ទទក) ហើយការមើលឃើញនេះ គឺតាមរយៈកាណាល់នៃស្ថានីយ៍ផ្សាយរបស់ទូរទស្សន៍ តាម​ប្រទេសនីមួយៗ។

លោក មាស សុភ័ណ្ឌ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន មានប្រសាសន៍ក្នុសន្និសីទសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងព័ត៌មាន” នាព្រឹកថ្ងៃទី ១ ខែកញ្ញា ឆ្នាំ ២០២២នេះ សម្រាប់ស្ថានីយ៍ទូរទស្សន៍ជាតិកម្ពុជា (ទទក) បានធ្វើទំនើបកម្មជាបន្តបន្ទាប់ ហើយបានបង្កើនម៉ោងផ្សាយរហូតដល់ ២៤ម៉ោង លើ ២៤ម៉ោង។ លើសនេះទៀត ការផ្សាយរបស់ទទក អាចឲ្យប្រទេសចំនួន ១៣០នៅលើពិភពលោក អាចមើលឃើញផងដែរ។

អ្នកនាំពាក្យក្រសួងព័ត៌មាន បានថ្លែងថា «ប្រទេសដែលមើលឃើញ ទូរទស្សន៍ជាតិរបស់យើងគឺ ១៣០ប្រទេសនៅជុំវិញពិភពលោក ដែលអាចមើលឃើញទូរទស្សន៍ជាតិរបស់យើង ហើយការមើលឃើញនេះ គឺអាចមើលឃើញតាមកាណាល់ នៃស្ថានីយ៍ផ្សាយរបស់ទូរទស្សន៍តាម​ប្រទេសនីមួយៗ អាចមើលតាមប្រព័ន្ធសៃថលប៊ុក ដែលយើងហៅថា TV Box ហ្នឹង ទូរទស្សន៍ដូចជា One TV ដូចជា តេជោ TV អី ជាដើម»៕

អត្ថបទ៖ ឃួន សុភ័ក្រ