កូឡុំប៊ី ប្រកាសប្រគល់ទ្រព្យសម្បត្តិដែលរឹបអូសបានពីក្រុមជួញដូរគ្រឿងញៀន ទៅឲ្យកសិករ និងស្ត្រី

ប្រធានាធិបតីឆ្វេងនិយម Gustavo Petro បាននិយាយកាលពីថ្ងៃព្រហស្បតិ៍ទី០១ខែកញ្ញាថា ប្រទេសកូឡុំប៊ី នឹងផ្តល់ទ្រព្យសម្បត្តិដែលរឹបអូសបានពីក្រុមជួញដូរគ្រឿងញៀន មានតម្លៃប្រហែល ៤.៩ពាន់លានដុល្លារទៅឲ្យកសិករ អង្គការស្ត្រី សម្ព័ន្ធយុវជន និងសាកលវិទ្យាល័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាធម្មតា ប្រទេសនៅតំបន់ជួរភ្នំ Andes មួយនេះ បានស្វែងរកការលក់ទ្រព្យសម្បត្តិ និងទំនិញដែលរឹបអូសបាន ដើម្បីផ្តល់សំណងដល់ជនរងគ្រោះ ហើយកាលពីឆ្នាំមុន បានបើកទីភ្នាក់ងារអចលនទ្រព្យមួយ ដែលមានភារកិច្ចគ្រប់គ្រងផ្ទះ កសិដ្ឋាន និងអចលនទ្រព្យផ្សេងៗ។

ប៉ុន្តែជារឿយៗ ការលក់ទាំងនោះគឺជួបបញ្ហាប្រឈម ដោយអ្នកទិញមានការភ័យខ្លាចថា ម្ចាស់មុន ឬសាច់ញាតិរបស់ពួកគេនឹងដណ្តើមយកវិញ ជាពិសេសនៅពេលដែលអតីតមេដឹកនាំយោធាស្តាំនិយមធំៗ វិលត្រលប់មកពីការកាត់ទោសគ្រឿងញៀននៅសហរដ្ឋអាមេរិក វិញ។

លោក Petro បាននិយាយនៅក្នុងព្រឹត្តិការណ៍អបអរសាទរការតែងតាំងមន្ត្រី រួមទាំងប្រធានថ្មី នៃអង្គភាពប្រឆាំងការលាងលុយកខ្វក់របស់ប្រទេស កូឡុំប៊ី ថា “យើងត្រូវតែធ្វើ ដើម្បីឲ្យទ្រព្យសម្បត្តិដែលទទួលបានដោយខុសច្បាប់ បានទៅដល់ដៃប្រជាជនកូឡុំប៊ី”។

គួរបញ្ជាក់ថា លោក Petro ដែលបានជាប់ឆ្នោតកាលពីខែមិថុនា បានសន្យាបង្កើតកម្មវិធីសង្គមដ៏មានមហិច្ឆតា ដែលលោកនិយាយថា នឹងចាប់ផ្តើមលុបបំបាត់ភាពអយុត្តិធម៌រយៈពេលច្រើនសតវត្សរ៍នៅក្នុងប្រទេសកូឡុំប៊ី ហើយថា លោកនឹងស្វែងរកសន្តិភាពទាំងស្រុង ជាមួយក្រុមទ័ពព្រៃឆ្វេងនិយមគឺ កងទ័ពរំដោះជាតិ (ELN) និងក្រុមឧក្រិដ្ឋជន៕

ប្រែសម្រួល៖ Vann Vann

ប្រភព៖ Reuters

ចុចអាន៖ ទីបំផុត កូឡុំប៊ី ចាប់បានមេគ្រឿងញៀនល្បីឈ្មោះបំផុត (មានវីដេអូ)