ឧកញ៉ា សុង សារ៉ន បង្ហាញយុទ្ធសាស្រ្ត​ទាក់ទាញប្រទេសជាង ៤០ឱ្យទិញ​អង្ករកម្ពុជា

សហព័ន្ធស្រូវអង្ករកម្ពុជា បានបង្កើតទីផ្សារនាំចេញអង្ករទៅទីផ្សារអន្តរជាតិ បានចំនួនជាង ៤០ប្រទេស ដែលជាទីផ្សារមាននិរន្តរភាព។

ក្នុងការងារទាក់ទាញទីផ្សារនាំចេញ មិនមែនជារឿងងាយស្រួលនោះទេ ពោលគឺត្រូវមានយុទ្ធសាស្រ្ត និងផែនការច្បាស់លាស់រវាងរដ្ឋ និងកសិករ។

លោកឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជា និងជាប្រធានក្រុមហ៊ុន Amru Rice បានលើកឡើងអំពីយុទ្ធសាស្រ្តដែលកម្ពុជា សម្រេចបានការនាំចេញអង្ករបានយ៉ាងល្អប្រសើរដូច្នេះថា«ទី១យើងត្រូវស្វែងយល់អំពីវប្បធម៌របស់ប្រទេសដែលយើងគ្រោងនាំចេញ…តាមពិតទៅភាគច្រើន យើងធ្វើជោគជ័យខ្លាំង គឺយើងសិក្សាទៅលើបរិបទវប្បធម៌ ឧទាហរណ៍ថា ជនជាតិអឺរ៉ុប ជាទូទៅ គួរមានទំនាក់ទំនងយ៉ាងម៉េច ដើម្បីឱ្យចូលជាមួយគាត់បាន ដូច្នេះខ្ញុំបានសិក្សាពីបរិបទនៃប្រទេសនីមួយៗ នូវគន្លឹះដើម្បីធ្វើឱ្យគាត់ទិញអង្កររបស់យើង…សម្រាប់ទីផ្សារចិន យើងក៏មានបរិបទក្នុងការទំនាក់ទំនង ភាសា និងប្រើប្រាស់យុទ្ធសាស្រ្ត ដើម្បីឱ្យគាត់អាចទិញអង្ករយើងបានដែរ»។

ក្រៅពីសិក្សាអំពីវប្បធម៌ និងទំនាក់ទំនង អំពីប្រទេសដែលគ្រោងនាំចេញ យើងក៏ត្រូវសិក្សាថាតើយើងមានអ្វីដែលជាគន្លឹះ​ឱ្យគេទិញយើង។ ប្រសិនបើយើងមានដូចគេ វាអត់មានអ្វីប្លែកសម្រាប់គេទេ ដូច្នេះយើងត្រូវមានអ្វីថ្មីសម្រាប់គាត់​[ទីផ្សារអន្តរជាតិ]។ នេះជាការបន្ថែមរបស់លោកឧកញ៉ា សុង សារ៉ន។

លោកឧកញ៉ា សុង សារ៉ន បានលើកឡើងថា កម្ពុជា ទើបតែចាប់ផ្តើមធ្វើទីផ្សារនាំចេញអង្កររយៈពេល ១០ឆ្នាំចុង​ក្រោយនេះ ទោះបីជាទទួលបានផ្លែផ្កាល្អប្រសើរ តែក៏មានបញ្ហាប្រឈម និងជួបការលំបាកច្រើន ដែលបានហែលឆ្លង។ លោកថា បញ្ហាខ្លាំងដែលកម្ពុជាជួបប្រទះ គឺយើងជាប្រទេសមួយដែលទើបលេចមុខមាត់ថ្មី ជាប្រទេសដែលអត់ឃ្លាន​ខ្វះស្បៀង ទៅជាប្រទេសសល់ស្បៀង ក្រោមការដឹកនាំរបស់សម្តេចតេជោ ហ៊ុន សែន ធ្វើឱ្យកម្ពុជា សល់ស្រូវច្រើន ដែលត្រូវកែច្នៃនាំចេញ។ លោកឧកញ៉ា បានបន្ថែមថា ប្រទេសយើងថ្មី ជាធម្មតាកម្រិតនៃការផលិតរបស់យើង​នៅទាបជាងប្រទេសជិតខាង ដែលមានបទពិសោធន៍យូរឆ្នាំ ការផលិតរបស់គេបានធំ ដោយប្រើដើមតិច ធ្វើឱ្យគេអាច​ប្រកួត​ប្រជែងទៅលើតម្លៃបាន។ បញ្ហាប្រឈមរបស់កម្ពុជា មួយទៀតនោះគឺ ការដឹកជញ្ជូន ។ មានន័យថា ប្រព័ន្ធដឹក​ជញ្ជូន​ពីវាលស្រែដល់រោងម៉ាស៊ីនកិនស្រូវ ផែ ហើយនឹងការដឹកជញ្ជូនតាមនាវាសមុទ្រទៅប្រទេសចុងក្រោយ ដែលទិញអង្កររបស់យើង។ ទោះយ៉ាងណា កម្ពុជា អាចធ្វើបានល្អទៅលើការនាំចេញអង្ករទៅទីផ្សារអន្តរជាតិ និង​គ្រោង​បង្កើន​ការនាំចេញ​អង្ករ​ក្រអូប និង​អង្ករ​សរីរាង្គ​ទៅកាន់​ទីផ្សារ​អាមេរិក ខណៈ​សហព័ន្ធ​ស្រូវ​អង្ករ​កម្ពុជា​ (CRF) ​យល់ឃើញ​ថា ទីផ្សារ​នេះ​មាន​សក្ដានុពល​ខ្លាំង​​។

សហព័ន្ធស្រូវអង្ករកម្ពុជា ក៏បានដាក់ផែនការនាំចេញអង្ករឱ្យបាន ៨០ម៉ឺនតោន ក្នុងឆ្នាំ ២០២២នេះ ខណៈដែល​រយៈពេល ៧ខែកន្លងមកនេះ កម្ពុជាសម្រេចការនាំ​ចេញអង្ករទៅ​ទីផ្សារអន្តរជាតិ បានប្រមាណជាង ៣៥ម៉ឺនតោន មានការកើនឡើងជាង១៣%។ ប្រទេសចិននៅតែឈរលំដាប់លេខ១ ដែលបានបញ្ជាទិញអង្ករច្រើនជាងគេពីកម្ពុជា ក្នុងបរិមាណ​ចំនួន ១៧ ម៉ឺនតោន ដែលមានការកើនឡើងជាង១០%។ ចំណែកបរិមាណអង្ករនាំចេញទៅកាន់ទិសដៅ​ទីផ្សារអឺរ៉ុបវិញ មានចំនួនប្រមាណជាង ១១ម៉ឺនតោន កើនឡើងចំនួន ៤៧% និង ទៅកាន់ប្រទេសក្នុងអាស៊ាន​មានចំនួនជិត ៣ម៉ឺនតោន កើនឡើងចំនួនជិត២%ផងដែរ។

សូមបញ្ជាក់ថា នៅឆ្នាំ ២០២១ ​មានក្រុមហ៊ុន​ដែល​បាន​នាំ​ចេញ​អង្ករ​​ចំនួន ៦២ ​ក្រុមហ៊ុន ក្នុងបរិមាណ​ចំនួន ៦១៧ ០៦៩ ​តោន ​ថយ​ចុះ​ចំនួន ៧៣. ៧៦០​ តោន (-១០,៦៨%​ បើ​ធៀប​នឹង​បរិមាណ​នាំ​ចេញ​ក្នុង​ឆ្នាំ​ ២០២០ ដែល​មាន​ចំនួន ៦៩០ ៨២៩​តោន៕