ម្ចាស់គេហទំព័រ Pzfilm ចេញមុខសុំទោស បង្ហោះ វីដេអូរឿងខ្លី ប៉ះពាល់តម្លៃស្ត្រីខ្មែរ

ក្រោយពីមានការផ្ទុះប្រតិកម្មពីសំណាក់មហាជន ក្រុមផលិតករ ម្ចាស់គេហទំព័រ Pzfilm បានលុបចោលនូវវីដេអូដែលខ្លួនបានផលិត និងសុំទោសជាសាធារណៈ នៅថ្ងៃទី២ ខែកញ្ញា ឆ្នាំ២០២២ នេះ។

បន្ទាប់ពីមានការផ្ទុះប្រតិកម្មរបស់មហាជន ពាក់ព័ន្ធនឹងការផលិតវីដេអូ និងបានផុសវីដេអូនៅលើផេក Pzfilm ដែលមានរូបភាពមិនសមរម្យ ប៉ះពាល់សីលធម៌ ប្រពៃណី ទំនៀមទំលាប់ និងតម្លៃរបស់ស្ត្រីខ្មែរ នាយកដ្ឋានសិល្បៈភាពយន្ត និងផ្សព្វផ្សាយវប្បធម៌ បានធ្វើការស្រាវជ្រាវ និងបានកោះអញ្ជើញ ក្រុមផលិតករដែលបានផលិតវីដេអូនោះ មកធ្វើការអប់រំ និងណែនាំ លើគោលការណ៍ នៃការផលិតវីដេអូ ដើម្បីចៀសវាងផលប៉ះពាល់នានាដល់វប្បធម៌ ប្រពៃណី អត្តសញ្ញាណជាតិ ពិសេសគុណតម្លៃនៃស្រ្តីខ្មែរ។

តាមរយៈការអប់រំ និងណែនាំនេះ ក្រុមផលិតករបានទទួលស្គាល់នូវកំហុស និងធ្វើការលុបចោល នូវវីដេអូដែលបានផ្សព្វផ្សាយលើបណ្តាញសង្គម ព្រមទាំងបានធ្វើការសុំទោសជាសាធារណៈ ចំពោះកំហុសឆ្គងដែលបានកើតមានឡើង និងធ្វើការសន្យាមិនឱ្យកំហុសនេះកើតមានឡើងជាថ្មីម្តងទៀត។