​អាជ្ញាធរខេត្តសៀមរាប ត្រៀមរៀបចំសន្តិសុខ សណ្តាប់ធ្នាប់ កិច្ចប្រជុំរដ្ឋមន្ត្រីសេដ្ឋកិច្ចអាស៊ានលើកទី៥៤

អាជ្ញាធរខេត្តសៀមរាប នៅព្រឹកថ្ងៃទី ០៥ ខែកញ្ញា ឆ្នាំ ២០២២ នេះ បានបើកកិច្ចប្រជុំមួយត្រៀមរៀបចំការងារសន្តិសុខ សណ្តាប់ធ្នាប់កិច្ចប្រជុំរដ្ឋមន្ត្រីសេដ្ឋកិច្ចអាស៊ានលើកទី៥៤ និងកិច្ចប្រជុំពាក់ព័ន្ធក្នុងខេត្តសៀមរាប ក្រោមការដឹកនាំរបស់ នាយឧត្តមសេនីយ៍ យូ ស៊ុនឡុង រដ្ឋមន្ត្រីប្រតិភូអមនាយករដ្ឋមន្ត្រី ដោយមានការចូលរួមរបស់គណៈបញ្ជាការឯកភាពរដ្ឋបាលខេត្តសៀមរាប។

ក្នុងកិច្ចប្រជុំនោះនាយឧត្តមសេនីយ៍ យូ ស៊ុនឡុង បានសង្កត់ធ្ងន់ទៅលើការងារ សន្តិសុខ សណ្តាប់ធ្នាប់ជូនដល់រដ្ឋមន្ត្រីនិងគណៈប្រតិភូជាសមាជិកអាស៊ានទាំង១០ប្រទេសទាំងការស្នាក់នៅ ការធ្វើដំណើរ និងក្នុងកិច្ចប្រជុំរដ្ឋមន្ត្រីសេដ្ឋកិច្ចអាស៊ានលើកទី៥៤។

ក្នុងនោះលោកក៏បានយកចិត្តទុកដាក់ខ្ពស់ លើការងារពិធីការក្នុងការរៀបចំទីកន្លែងប្រជុំ ឲ្យត្រូវទៅតាមស្តង់ដារ នៃកិច្ចប្រជុំកំពូលអាស៊ានទៀតផង។ លោកក៏បានគូសបញ្ជាក់ថា កិច្ចប្រជុំរដ្ឋមន្ត្រីសេដ្ឋកិច្ចអាស៊ានលើកទី៥៤ ដែលនឹងប្រព្រឹត្តទៅនៅថ្ងៃទី ១៤ ខែកញ្ញា ឆ្នាំ២០២២ នៅក្រុងសៀមរាប ក្រោមអធិបតីដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី និងជាប្រធានអាស៊ាន។

ក្នុងនោះលោក ក៏បានធ្វើការណែនាំមួយចំនួន ដល់កងកម្លាំងដែលមានសមត្ថកិច្ច គឺត្រូវក្តាប់ឲ្យបាននូវរាល់សភាពការផ្សេងៗ នៅក្នុង តំបន់មូលដ្ឋានខ្លួន និងគោលដៅទទួលខុស ព្រមទាំងឲ្យអាជ្ញាធរខេត្ត ត្រូវយកចិត្តទុកដាក់ទៅលើ​ការសម្អាតបរិស្ថាន អនាម័យក្នុងក្រុងប្រវត្តិសាស្ត្រមួយនេះ ដើមី្បទទួលស្វាគមន៍ដល់គណៈប្រតិភូជាន់ខ្ពស់អាស៊ាន ក៏ដូចភ្ញៀវទេសចរជាតិ អន្តរជាតិ ចូលមកទស្សនាផងដែរ៕

អត្ថបទ៖គឿនវេត