ណែនាំ​ឲ្យស្គាល់​បណ្ណាល័យ ៧ កន្លែង​​នៅ​ភ្នំពេញ សិស្សអាចចូលសិក្សាស្រាវជ្រាវបាន

សម្រាប់សិស្សនិស្សិតដែលកំពុងបន្តការសិក្សានៅរាជធានីភ្នំពេញច្បាស់ជាចង់ស្វែងរកនៅបណ្ណាល័យដែលអាចសិក្សាស្រាវជ្រាវមេរៀនសំខាន់ផ្សេងៗដែលគ្រូបានដាក់ឲ្យ ឬសម្រាប់សិស្សមួយចំនួនដែលចូលចិត្តការអានសៀវភៅ។ មានសិស្សខ្លះក៏បានស្គាល់អំពីវត្តមាននៃបណ្ណាល័យទាំងអស់នោះ ប៉ុន្តែសិស្សខ្លះទៀតក៏មិនបានដឹងនោះទេ។

ថ្ងៃនេះ«កម្ពុជាថ្មី» នឹងណែនាំ​បណ្ណាល័យមួយចំនួននៅរាជធានីភ្នំពេញសម្រាប់សិស្សនិស្សិតក្នុងការស្វែងរកសៀវភៅ។

១. បណ្ណាល័យជាតិកម្ពុជា

បណ្ណាល័យជាតិបង្កើតឡើងនៅថ្ងៃទី២៤ ធ្នូ ១៩២៤ ក្នុង​សម័យ​អាណានិគម​បារាំង ដែល​អាសយដ្ឋាន​របស់​បណ្ណាល័យ​គឺនៅ​ទល់​មុខ​សាកលវិទ្យាល័យ​ជាតិ​គ្រប់គ្រង​ តាម​បណ្ដោយ​​​​ផ្លូវ​គ្រីស្តួភើ ហូវ (​ផ្លូវ​​៩២)។ បណ្ណាល័យមួយនេះ មានផ្ទុកឯកសារសំខាន់ៗ សៀវភៅរាប់ម៉ឺនក្បាល បណ្តុំឯកសារចាស់ៗដែលបន្សល់ទុកកាលពីសម័យមុនសង្គ្រាម និងឯកសារសំខាន់ៗមួយចំនួនផ្សេងទៀត។

សិស្ស និស្សិតអាចចូលសិក្សាស្រាវជ្រាវបានដោយមិនគិតថ្លៃ ហើយ​បើ​ចង់ខ្ចីសៀវភៅត្រូវធ្វើកាតសមាជិកជាមុនសិន។

បណ្ណាល័យនេះបើកពីថ្ងៃច័ន្ទ-សុក្រ (លើកលែង សៅរ៍-អាទិត្យ និងថ្ងៃបុណ្យ) ចាប់ពីម៉ោង ៨:០០ ដល់ម៉ោង ១១:០០ ព្រឹក និង ២:០០ ដល់ម៉ោង៥:០០ ល្ងាចផងដែរ។

២.បណ្ណាល័យអាឡីយ៉ង់ ហ្វ្រង់សេ

បណ្ណាល័យនេះជាបណ្ណាល័យឯកជន ប៉ុន្តែអ្នកសិក្សាអាចចូលអានសៀវភៅនៅទីនោះបានដោយមិន​គិត​ថ្លៃ ដែលមានសៀវភៅគ្រប់ប្រភេទ ទាំងភាសាជាតិ ភាសាបារាំង អង់គ្លេស ពិសេសគឺកន្លែងអង្គុយបំពាក់ម៉ាស៊ីនត្រជាក់មានផាសុកភាព ហើយសិស្សនិស្សិតចង់ខ្ចីសៀវភៅត្រូវមានកាតសមាជិក។

បណ្ណាល័យនេះ មានទីតាំងនៅលើផ្លូវ១៨០ ចន្លោះផ្លូវត្រសក់ផ្អែម និងផ្លូវព្រះមុនីវង្ស ក្នុងខណ្ឌដូនពេញ រាជធានីភ្នំពេញ។

៣. បណ្ណាល័យព្រឹទ្ធសភា

ជាបណ្ណាល័យរបស់រដ្ឋមួយ ដែលសំបូរទៅដោយសៀវភៅ និងឯកសារច្បាប់សំខាន់ៗរបស់កម្ពុជា និងមានទីតាំងស្ថិត មហាវិថីព្រះនរោត្តម រាជធានីភ្នំពេញ។ បណ្ណាល័យនេះ បើកចាប់ពីម៉ោង០៧:៣០-១១:០០ ព្រឹក និង ០២:០០-០៥:០០ ល្ងាច ពីថ្ងៃ ច័ន្ទ-សុក្រ និង​ថ្ងៃសៅរ៍ ចាប់ពីម៉ោង ០៧:៣០ ដល់ ១១:០០ ព្រឹក។

សិស្ស និស្សិត អាចខ្ចីសៀវភៅបានលុះត្រាតែមានកាតសមាជិក ដែលស្នើធ្វើពុំមានគិតថ្លៃទេ ឬអាចខ្ចីសៀវភៅម្ដងបាន ២ក្បាល និងរយៈពេល ២សប្ដាហ៍ ដោយកក់ប្រាក់ចាប់ពី៥ពាន់រៀលឡើងទៅ។

៤. បណ្ណាល័យបៃតង

សម្រាប់បណ្ណាល័យនេះ បង្កើតឡើងដោយក្រសួងបរិស្ថានតាំងពីដើមឆ្នាំ ២០១៧។ បណ្ណាល័យនេះ ក៏មានផ្ទុកសៀវភៅអប់រំបរិស្ថាន អភិវឌ្ឍជីវៈចម្រុះ ការបំពុល កិច្ចគាំពារបរិស្ថាន ប្រព័ន្ធអេកូឡូស៊ី ព្រមទាំងសៀវភៅទាក់ទងនឹងការប្រែប្រួលអាកាសធាតុ សេដ្ឋកិច្ចបៃតង។

ទីតាំងបណ្តាល័យ​នេះ ស្ថិតនៅទីស្ដីការក្រសួងបរិស្ថានផ្លូវទៅកោះពេជ្រ។

៥. បណ្ណាល័យសម្ដេចហ៊ុន សែន នៃសាកលវិទ្យាល័យភូមិន្ទភ្នំពេញ

បណ្ណាល័យនេះស្ថិតនៅក្នុងសាកលវិទ្យាល័យភូមិន្ទភ្នំពេញជិតអគារ CKCC។ មានសៀវភៅរាប់ម៉ឺនក្បាល និងច្រើនមុខវិជ្ជាទាក់ទងមុខវិទ្យាផ្សេងៗ ដូចជាប្រវត្តិសាស្ត្រខ្មែរ វិទ្យាសាស្ត្រ ធនាគារជាដើម។ ប្រសិនបើអ្នកចង់ខ្ចីសៀវភៅត្រូវធ្វើកាតសមាជិកជាមុនសិន។ សិស្សអាចខ្ចីសៀវភៅបាន លុះតាតែធ្វើកាតសមាជិកសម្រាប់និស្សិតសាកលវិទ្យាល័យភូមិន្ទភ្នំពេញ។ សម្រាប់សាធារណជន សិស្សនិស្សិតសាលាផ្សេង តម្រូវឲ្យកក់ប្រាក់ខ្លះពេលខ្ចីសៀវភៅ។

បណ្តាល័យ​នេះ​ចាប់បើក​ពី​ថ្ងៃ​ច័ន្ទ-សុក្រ ពីម៉ោង ០៧:០០ ព្រឹក ដល់០៥:០០ល្ងាច។ ឯថ្ងៃសៅរ៍បើកពីម៉ោង ៨:០០ ព្រឹក ដល់ ០៤:០០ ល្ងាច។

៦. បណ្ណាល័យ អាមេរិកខែន ខរនើ (American Corner)  

បណ្ណាល័យមួយនេះ មានសៀវភៅសម្រាប់សិក្សាភាសាអង់គ្លេស និងឯកសារផ្សេងៗទៀតពីសហរដ្ឋអាមេរិក។ មានដូចជាប្រវត្តិសាស្ត្រ វប្បធម៌ ពាណិជ្ជកម្ម ច្បាប់ នយោបាយ និងលទ្ធិប្រជាធិបតេយ្យ របស់សហរដ្ឋអាមេរិក។ បណ្ណាល័យនេះ ស្ថិតនៅមហាវិថីព្រះនរោត្តម រាជធានីភ្នំពេញ បើកចាប់ពីថ្ងៃច័ន្ទ-សុក្រ ៧:៣០ ព្រឹក ដល់៨:៣០យប់។ រីឯសៅរ៍-អាទិត្យ បើកពីម៉ោង ៨:០០ព្រឹក ដល់ ៥:៣០ រសៀល។ សិស្សអាចខ្ចីសៀវភៅបាន គឺតម្រូវឲ្យធ្វើកាតសមាជិក ដោយពុំមានគិតថ្លៃ។ អាចខ្ចីសៀវភៅម្ដងបានពីរក្បាល និងរយៈពេលពីរសប្ដាហ៍។

៧. បណ្ណាល័យបញ្ញាវ័ន្ត

បណ្ណាល័យបញ្ញាវ័ន្ត មានទីតាំងស្ថិតនៅក្បែរសាលាបឋមសិក្សាទួលស្លែង ហើយមានផ្ទុកសៀវភៅជាច្រើនក្បាលពាក់ព័ន្ធច្បាប់ សេដ្ឋកិច្ច បរិស្ថាន អក្សរសាស្ត្រ និងរឿងព្រេង ដែលមានទាំងភាសាខ្មែរ និងបរទេស៕

ដោយ៖ ឌឿនចាន់ ថារី