Justin Bieber ប្រកាសលុបចោលការប្រគំតន្ត្រីបន្ទាប់ ទោះជាសះស្បើយពីជំងឺ

Justin Bieber បានលុបចោលការប្រគំតន្រ្តី “Justice Tour” ដោយសារមានបញ្ហាផ្លូវកាយ និងផ្លូវចិត្ត បើទោះជាបានជាសះស្បើយពីជំងឺ Ramsay Hunt Syndrome ឬជំងឺខ្វិនលើផ្ទៃមុខក៏ដោយ ។

តារាចម្រៀងជនជាតិកាណាដាវ័យ ២៨ ឆ្នាំរូបនេះ បានប្រកាសការលុបចោលការប្រគំតន្ត្រីបន្ទាប់នៅអាមេរិកខាងត្បូង ប្រទេសអូស្ត្រាលី និងទ្វីបអឺរ៉ុប ក្រោយទើបបញ្ចប់ព្រឹត្តិការណ៍នេះនៅប្រទេសប្រេស៊ីល ។

ទន្ទឹមនឹងនេះ Justin Bieber បានបញ្ជាក់បន្ថែមនៅលើបណ្ដាញ Instagram ទៀតថា “បន្ទាប់ពីឡើងលើឆាកសម្តែងរួច ខ្ញុំមានការនឿយហត់ជាខ្លាំងដែលធ្វើឲ្យប៉ះពាល់សុខភាពរបស់ខ្ញុំ ដូច្នេះហើយទើបខ្ញុំត្រូវបញ្ឈប់ការប្រគំតន្ត្រីនៅពេលនេះ ។ ខ្ញុំមិនអីទេ ប៉ុន្តែខ្ញុំត្រូវការពេលសម្រាកដើម្បីឲ្យសុខភាពកាន់តែប្រសើរឡើង” ។

យ៉ាងណាមិញនេះមិនមែនជាលើកទី ១ នោះទេដែលតារាចម្រៀង Justin Bieber លុបចោលការសម្ដែងនេះ ពោលនៅពេលថ្មីៗនេះម្ចាស់បទ “Baby” ក៏បានរំសាយការសម្ដែងរួចទៅហើយ ព្រោះតែបញ្ហាជំងឺខ្វិនលើផ្ទៃមុខរបស់ខ្លួន ខណៈកាលពីឆ្នាំ ២០១៧ តារាចម្រៀងរូបនេះក៏បានលុបចោលការប្រគំតន្ត្រីនៅអាមេរិកខាងជើង ដោយសារតែបញ្ហាសុខភាពផ្លូវចិត្ត ៕

ប្រែសម្រួលដោយ ៖ នាងតូច