ប្រធានផ្សារបឹងកេងកង ព្រមានបិទតូបណា​ដែលលក់ផលិតផលហួសកាលកំណត់

ប្រធានផ្សារបឹងកេងកង បានចុះត្រួតពិនិត្យមុខទំនិញផ្សេងៗ ដែលកំពុងដាក់លក់នៅក្នុងផ្សារ ដើម្បីរក្សាសុវត្ថិភាព ជូនដល់អ្នកប្រើប្រាស់ នៅថ្ងៃទី ០៩ ខែ កញ្ញា ឆ្នាំ ២០២២។

លោក ឯក និមល ប្រធានគណៈកម្មការគ្រប់គ្រងផ្សារបឹងកេងកង បានថ្លែងប្រាប់កម្ពុជាថ្មី ថា អាជ្ញាធរផ្សារតែងតែ​ចុះត្រួតពិនិត្យមុខទំនិញជាប្រចាំ ដើម្បីសុវត្ថិភាពដល់ប្រជាពលរដ្ឋ ដែលទិញយកទៅប្រើប្រាស់។

លោក ឯក និមល បានគូសបញ្ជាក់ដូច្នេះថា«ជាទូទៅ យើងខ្ញុំតែងចុះណែនាំបងប្អូន អាជីវករលក់ដូរ ផលិតផល វេចខ្ចប់ស្រាប់ ឱ្យមានការពិនិត្យកាលបរិច្ឆេទប្រើប្រាស់ ម៉ត់ចត់ បើយើងខ្ញុំ ពិនិត្យឃើញថា ខូចគុណភាព ឬហួសកាលបរិច្ឆេទប្រើប្រាស់  យើងនឹងធ្វើការដកហូតទុក និង សុំយោបល់ថ្នាក់លើ ធ្វើការផ្អាក ឬបិទតូបជា​បណ្តោះអាសន្ន។ តែក្នុង ការចុះពិនិត្យនេះ មិនមានផលិតផល មួយណា ខូចគុណភាពឬ ហួសកាល​បរិច្ឆេទប្រើប្រាស់នោះទេ» ។ 

លោកថ្លែងបែបនេះ នៅពេលដែលដឹកនាំប្រជុំពង្រឹង ការងារសន្តិសុខ សណ្តាប់ធ្នាប់ ដល់កម្លាំងសន្តិសុខចំណុះ​គណៈកម្មការផ្សារ  និងបានចុះពិនិត្យ គុណភាពផលិតផល វេចខ្ចប់ស្រាប់ ពិសេសកាលបរិច្ឆេទប្រើប្រាស់  ការពារជន​ខិលខូច លួចបន្លំលក់ផលិតផល ខូចគុណភាព ក្នុងរដូវកាលបុណ្យភ្ជុំបិណ្ឌនេះ។

សូមបញ្ជាក់ថា បច្ចុប្បន្ននេះ ផ្សារបឹងកេងកង មានតូបលក់ដូរប្រមាណ ១៤១១តូប និងមានអាជីវករប្រមាណជិត ៩០០នាក់ ដែលកំពុងប្រកបអាជីវកម្មក្នុងផ្សារនេះ។ ផ្សារនេះ មានលក់ដូរទំនិញច្រើនមុខ និងសម្លៀកបំពាក់ថ្មី និងក្បាលគីប ដែលពេញនិយមខ្លាំងសម្រាប់យុវវ័យ។ ចំណែកចំណីអាហារសម្រាប់ទទួលទាន ក៏មានលក់ក្នុង​ផ្សារច្រើនផងដែរ៕