​រោងចក្រផលិតវ៉ាក់សាំងកម្ពុជា​កំពុងសាងសង់នៅលើផ្ទៃដី ៥ ហិកតានៅខេត្តកណ្ដាល​

លោកស្រី យក់ សម្បត្តិ រដ្ឋលេខាធិការក្រសួងសុខាភិបាល​បានឱ្យដឹងថា ​ក្រសួងកំពុង​ធ្វើការ​ជាមួយ​ក្រុមហ៊ុន​ទៅលើការសាងសង់រោងចក្រផលិតវ៉ាក់សាំងនៅកម្ពុជា។

លោកស្រី យក់ សម្បត្តិ មានប្រសាសន៍នៅថ្ងៃទី ១៥ ខែកញ្ញា ២០២២នេះថា ក្រសួងសុខាភិបាល​ធ្វើការច្រើន​ជាមួយក្រុមហ៊ុនស៊ីណូវ៉ាក់នៅប្រទេសចិន និងដៃគូឯក​ជន​ក្នុងការធ្វើការវិនិយោគទុន​ក្នុង​ការសាងសង់រោងចក្រ​ផលិតវ៉ាក់សាំងកូវីដ១៩នៅកម្ពុជា។

រហូតមកដល់ពេលនេះ ក្រសួងបានរៀបចំ​ឱ្យក្រុមហ៊ុនឯក​ជនចាក់បំពេញដីលើទីតាំងសាងសង់​រោងចក្រស្ថិត​នៅភូមិទួល​អំពិល​ ឃុំពញាឮ ស្រុកពញាឮ ខេត្តកណ្ដាល ដែលមានទំហំដីប្រមាណ ៥ ហិកតា។ ដែលលោកស្រីអះអាងថា ជារោងចក្រដែលមានស្ដង់ដារ​អន្តរជាតិពីក្រុមហ៊ុនស៊ីណូវ៉ាក់។

លោកស្រី យក់ សម្បត្តិឱ្យដឹងថា ការរៀបចំរោងចក្រនេះគឺជាការច្រក និងវេចច្ចប់​បានន័យថា ក្រុមហ៊ុន​ដែលបានទទួលសិទ្ធិក្នុងការផលិត គឺជាក្រុមហ៊ុនមួយ​ដែលមានបទពិសោធន៍​ក្នុងការផលិតឱសថក្នុងស្រុកកន្លងមក។

មន្ត្រីជាន់ខ្បស់ក្រសួងសុខាភិបាលរូបនេះបញ្ជាក់ថាពេលនេះ ការបំពេញដីសឹងតែរួចរាល់ ១០០% ហើយឈានទៅបើកការដ្ឋាន​ជាផ្លូវការ​នៅខែ វិច្ឆិការ ឆ្នាំ ២០២២ ដ៍ខ្លីខាងមុខនេះ៕

អត្ថបទ៖ ឡេង ដេត