រុស្ស៊ី ធ្វើសមយុទ្ធបាញ់មីស៊ីលកៀករដ្ឋ អាឡាស្កា ត្រៀមប្រយុទ្ធក្នុងដែនទឹកកកជាមួយ​ អាមេរិក

នៅចុងសប្តាហ៍នេះ នាវាមុជទឹកដើរដោយថាមពលនុយក្លេអែររបស់រុស្ស៊ី បានបាញ់មីស៊ីលផ្លោងនៅក្នុងមហាសមុទ្រ អាកទិក ដែលជាផ្នែកនៃសមយុទ្ធយោធា ត្រូវបានធ្វើឡើងដើម្បីសាកល្បងការត្រៀមខ្លួនរបស់ទីក្រុងមូស្គូ សម្រាប់ជម្លោះដែលអាចកើតមាននៅក្នុងដែនទឹកកកភាគខាងជើងរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមយុទ្ធដែលមានឈ្មោះថា Umka-2022 បានធ្វើឡើងនៅសមុទ្រ Chukchi ដែលជាតំបន់ភាគខាងកើតនៃមហាសមុទ្រអាកទិក ពុះចែកប្រទេសរុស្ស៊ី ពីរដ្ឋអាឡាស្កា របស់សហរដ្ឋអាមេរិក។

រុស្ស៊ី មើលឃើញថា ទឹកដីអាកទិកដ៏ធំរបស់ខ្លួនគឺជាផលប្រយោជន៍យុទ្ធសាស្ត្រដ៏សំខាន់ ហើយបាននិងកំពុងកសាងសមត្ថភាពយោធារបស់ខ្លួននៅក្នុងតំបន់នោះ អស់រយៈពេលជាច្រើនឆ្នាំមកហើយ ដោយធ្វើឲ្យលោកខាងលិចមានការព្រួយបារម្ភយ៉ាងខ្លាំង។

ក្រសួងការពារជាតិរុស្ស៊ីបាននិយាយនៅថ្ងៃសៅរ៍ទី១៧ខែកញ្ញាថា នាវាមុជទឹកដើរដោយថាមពលនុយក្លេអ៊ែរចំនួនពីរគ្រឿងឈ្មោះ Omsk និង Novosibirsk បានបាញ់មីស៊ីលប្រឆាំងនាវាចេញពីសមុទ្រ Chukchi ដោយវាយប្រហារចំគោលដៅនៅចម្ងាយ ៤០០គីឡូម៉ែត្រ។

ក្រៅពីការបាញ់មីស៊ីលចេញពីនាវាមុជទឹកដើរដោយថាមពលនុយក្លេអ៊ែរ ប្រព័ន្ធមីស៊ីលលើឆ្នេរ “Bastion” របស់រុស្ស៊ី ក៏បានបាញ់មីស៊ីលចេញពីទឹកដីចុងភាគខាងកើតគឺឧបទ្វីប Chukchi ទៅកាន់គោលដៅដែលមានមូលដ្ឋានលើសមុទ្រ ក្នុងចម្ងាយ ៣០០គីឡូម៉ែត្រផងដែរ។

យោងតាមក្រសួង, សមយុទ្ធនៅតំបន់អាកទិកក្នុងសប្តាហ៍នេះ គឺជាការសាកល្បងសមត្ថភាព និងការត្រៀមខ្លួនរបស់រុស្ស៊ី ដើម្បីការពារតំបន់អាកទិករបស់ទីក្រុងមូស្គូ ដោយមធ្យោបាយយោធា។

ទីក្រុងមូស្គូ នៅតែបន្តកម្មវិធីសមយុទ្ធយោធាកម្រិតខ្ពស់ ថ្វីបើកងកម្លាំងជើងគោកភាគច្រើនរបស់ខ្លួន កំពុងជាប់ដៃក្នុងប្រតិបត្តិការនៅអ៊ុយក្រែនក៏ដោយ។ កាលពីដើមខែនេះ ខ្លួនបានធ្វើសមយុទ្ធសង្គ្រាមទ្រង់ទ្រាយធំនៅតំបន់ចុងបូព៌ា ដោយមានកងទ័ពចូលរួមប្រមាណ ៥ម៉ឺននាក់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ NDTV

ចុចអាន៖ ចំណុចសំខាន់ៗ ដែលអ្នកគួរដឹងអំពីសមយុទ្ធ Vostok 2022