ព័ត៌មានអន្ដរជាតិ

រុស្ស៊ី បញ្ជាក់ហេតុផលពីក្រោយការប្រកាសកែនទ័ពនៅក្នុងប្រទេស

បានផុស

២ years មុន

នៅ

ថ្ងៃសុក្រ ២៣ កញ្ញា ២០២២

ដោយ

អ្នកនាំពាក្យវិមានក្រឹមឡាំងលោក Dmitry Peskov បាននិយាយកាលពីថ្ងៃព្រហស្បតិ៍ថា ការប្រកាសកែនទាហានមួយផ្នែកនៅក្នុងប្រទេសរុស្ស៊ីគឺដើម្បីជាការឆ្លើយតបទៅនឹងជំនួយរបស់អង្គការណាតូចំពោះអ៊ុយក្រែន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Peskov បានប្រាប់អ្នកយកព័ត៌មាននៅក្នុងសន្និសីទសារព័ត៌មាននៅទីក្រុងមូស្គូថា “ប្រតិបត្តិការយោធាពិសេសបានចាប់ផ្តើមដើម្បីបំពេញគោលដៅនៅអ៊ុយក្រែន ប៉ុន្តែយើងត្រូវបានជំទាស់ដោយប្លុកណាតូទាំងមូលជាមួយនឹងសមត្ថភាពសព្វាវុធរបស់ពួកគេទាំងអស់ ដូច្នេះវាជាភាពចាំបាច់ដើម្បីប្រកាសការកែនទ័ពនេះ” ។

អ្នកនាំពាក្យរូបនេះបាននិយាយថា ស្ថានភាពនៃ “ប្រតិបត្តិការយោធាពិសេស” មិនបានផ្លាស់ប្តូរទេ ចាប់តាំងពីការប្រកាសកែនទ័ព ។ លោកបានគូសបញ្ជាក់ថា មានច្បាប់ស្តីពីការកែនទ័ពនៅក្នុងប្រទេសរុស្ស៊ី ពោលក្រឹត្យនេះអនុវត្តចំពោះតែអ្នកដែលមានបទពិសោធន៍ប្រយុទ្ធ និងសេវាកម្មពាក់ព័ន្ធប៉ុណ្ណោះ ។

លោក Peskov បានបន្តថា ទោះយ៉ាងណា ប្រភេទអ្នកដែលត្រូវរាយការណ៍សម្រាប់ការបម្រើជាយោធា និងអ្នកដែលត្រូវបានលើកលែងពីការកែននេះ នឹងត្រូវប្រកាសដោយរដ្ឋាភិបាលក្នុងពេលឆាប់ៗនេះ ។

គួរបញ្ជាក់ថា កាលពីថ្ងៃពុធប្រធានាធិបតីរុស្ស៊ីលោក វ្ល៉ាឌីមៀរ ពូទីន បានប្រកាសពីការកែនទ័ពមួយផ្នែកនៅក្នុងប្រទេស ដែលនឹងប៉ះពាល់ដល់មនុស្សប្រហែល ៣០០,០០០ នាក់ដែលមានអាយុចន្លោះពី ១៨ ទៅ ៥០ ឆ្នាំ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ Zelensky ប្រាប់អតីតប្រធានាធិបតី អាមេរិក ពីអ្វីដែលក្រុងវ៉ាស៊ីនតោន អាចជួយដល់ អ៊ុយក្រែន