បុរសម្នាក់ចូលបោកខោអាវក្នុងបន្ទប់ទឹក ឆ្លៀតស្តាប់បទចម្រៀងរហូតបាត់បង់ជីវិត

បុរសម្នាក់បាន​បាត់បង់ជីវិតពេល​កំពុងបោកខោអាវ​បង្កការភ្ញាក់ផ្អើលដល់អ្នកជិតខាង និងបានរាយការណ៍ដល់សមត្ថកិច្ចដើម្បីចុះអន្តរាគមន៍ ខណះក្រុមគ្រួសារនៅមិនទាន់ដឹងហេតុផលនៅឡើយ។

ករណីខាងលើបានកើតឡើងនៅថ្ងៃទី ២៧ ខែកញ្ញា ឆ្នាំ ២០២២ នេះ វេលាម៉ោង ០៨:១០នាទី។ ជនរងគ្រោះឈ្មោះ មុយ វ៉ាន់ទី ភេទ ប្រុស អាយុ ៣៤ឆ្នាំ រស់នៅភូមិតាស៊ង ឃុំបាយដំរាំ ខេត្ត​បាត់ដំបង។

ការស្លាប់របស់ជនរងគ្រោះ ក្រុមគ្រួសារមិនទាន់ដឹងអំពីមូលហេតុនៅឡើយ ខណៈ​កម្លាំងប៉ុស្តិ៍បាន​ចុះ​​ធ្វើការហ៊ុំព័ទ្ធការពារកន្លែងកើតហេតុ និងរាយការណ៍ជូនផ្នែកជំនាញដើម្បីចុះមកពិនិត្យកន្លែងកើតហេតុ។

ក្រោយសមត្ថកិច្ចជំនាញបានពិនិត្យលើសាកសព និងបរិវេណក្នុងបន្ទប់កើតហេតុ សមត្ថកិច្ចបានរកឃើញថា ជនរងគ្រោះបានតខ្សែភ្លើងចូលក្នុងបន្ទប់ទឹកដើម្បីប្រើប្រាស់ ហើយដំណរខ្សែភ្លើងមិនបានរុំបិទត្រឹមត្រូវនោះទេទើបជនរងគ្រោះបានប៉ះចំដំណរខ្សែភ្លើងបណ្តាលឲ្យឆក់ស្លាប់តែម្តង។

ការរកឃើញហេតុផលនៃការស្លាប់របស់ជនរងគ្រោះពីសមត្ថកិច្ចជំនាញ ស្របការលើកឡើងពីក្រុមគ្រួសារជនរងគ្រោះថា មុននឹងចូលបន្ទប់ទឹកបោកខោអាវ ជនរងគ្រោះបានតខ្សែភ្លើងចូលក្នុងបន្ទប់ទឹកតាមបង្អូច ដើម្បីស្តាប់ចម្រៀងទើបមានហេតុការនេះកើតឡើងតែម្តង។

ក្រោយសមត្ថកិច្ចពិនិត្យនិងបានផ្តល់ហេតុផលរួចរាល់ បានប្រគល់សពឲ្យគ្រុមគ្រួសាររៀបចំធ្វើបុណ្យតាមប្រពៃណី៕

អត្ថបទ៖ សៅ សារិទ្ធ