វៀតណាម ព្យាករណ៍ពីកំណើន GDP ពេញមួយឆ្នាំ ២០២២ នេះ

វៀតណាមរំពឹងថា ក្នុងឆ្នាំ ២០២២ នេះ GDP របស់ខ្លួននឹងកើនដល់ ៨ ភាគរយ ពោលការកើនឡើងនេះគឺហួសផែនការកំណត់របស់ក្រសួងដល់ទៅ ១.៥ ទៅ ២ ភាគរយ ។

នៅក្នុងរយៈពេល ៩ ខែនៃឆ្នាំ ២០២១ ដល់ឆ្នាំ ២០២២, GDP របស់វៀតណាមមានកំណើនដល់ទៅ ៨.៨៣ ភាគរយឯណោះ ដោយកំណើននេះ គឺកើនហួសពីផែនការដែលវៀតណាមបានកំណត់ ។

ទន្ទឹមនោះ ស្ថិតក្នុងរយៈពេល ៩ ខែកន្លងមកនេះ វិស័យកសិកម្ម រុក្ខប្រមាញ់ និងនេសាទវៀតណាមមានកំណើន ២.៩៩ ភាគរយ, វិស័យឧស្សាហកម្ម និងសំណង់កើនឡើងដល់ ៩.៤៤ ភាគរយ និងវិស័យសេវាកម្មកើន ១០.៥៧ភាគរយ ។

ជាមួយគ្នានោះ ធនាគារ ADB ព្យាករណ៍ថា GDP របស់វៀតណាមអាចកើនដល់ ៦.៥ ភាគរយ ខណៈប្រធានស្រាវជ្រាវផ្នែកសេដ្ឋកិច្ចអាស៊ីនៅក្រុមហ៊ុន HSBC ក៏បានព្យាករណ៍ដូចគ្នាដែរថា អាចកើនដល់ ៦.៩ ភាគរយឯណោះ ។ ដោយឡែក ចំពោះធនាគារពិភពលោកវិញ ព្យាករណ៍ថា GDP របស់វៀតណាម នឹងមានកំណើនដល់ទៅ ៧.២ ភាគរយសម្រាប់ឆ្នាំ ២០២២ នេះ ។

តាមរយៈការព្យាករណ៍កំណើននេះ នឹងធ្វើឲ្យវៀតណាម ក្លាយទៅជាប្រទេសដែលមាន GDP ខ្ពស់ជាងគេនៅក្នុងតំបន់អាស៊ីអាគ្នេយ៍ និងប៉ាស៊ីហ្វិកសម្រាប់ឆ្នាំ ២០២២ ជាពិសេសវានឹងក្លាយជាសន្ទុះដ៏សំខាន់មួយសម្រាប់ផែនការអភិវឌ្ឍន៍ដល់ឆ្នាំ ២០២៥ ៕

ប្រែសម្រួលដោយ ៖ នាង រតនៈ

ប្រភព ៖ VN Express

ចុចអាន ៖ GDP របស់ វៀតណាម កើនឡើង ១៣.៦៧ ភាគរយក្នុងត្រីមាសទី ៣