ផ្សាររថយន្តខុសបច្ចេកទេស​ ប៉ះចរន្ដអគ្គិសនីឆក់ស្លាប់ភ្លាមៗក្នុងយាន្ដដ្ឋានជួសជុល

បុរសម្នាក់បានស្លាប់ភ្លាមនៅកន្លែងកើតហេតុបន្ទាប់ពីផ្សាររថយន្តខុសបច្ចេកទេសប៉ះខ្សែភ្លេីងបណ្តាលឲ្យឆក់ នៅក្នុងយាន្តដ្ឋានជួសជុលរថយន្តមួយកន្លែង ស្ថិតតាមបណ្តោយផ្លូវក្រវ៉ាត់ក្រុងភ្នំពេញ(ផ្លូវ៥០ម៉ែត្រ) ភូមិពាម សង្កាត់ព្រៃស ខណ្ឌដង្កោ រាជធានីភ្នំពេញ កាលពីវេលាម៉ោង១០និង៣០នាទីព្រឹកថ្ងៃទី៦ ខែតុលា ឆ្នាំ២០២២ ។

ជនរងគ្រោះមានឈ្មោះ ថូ ផាត់យុត ភេទប្រុស អាយុ២៨ឆ្នាំ ជាងផ្សារ ស្នាក់នៅកន្លែងកើតហេតុ មានស្រុកកំណើតភូមិក្អមសំណរក្រោម ឃុំក្អមសំណរ ស្រុកលើកដែក ខេត្តកណ្តាល ។

តាមប្រភពព័ត៌មានបានឲ្យដឹងថា មុនពេលកេីតហេតុជនរងគ្រោះបានផ្សារតោនរថយន្តមួយគ្រឿង ខណៈកំពុងផ្សារក៏បានប៉ះខ្សែភ្លេីងបណ្តាលឲ្យឆក់ ភ្លាមនោះបងប្អូនឃេីញដូចនេះក៏ជួយសង្គ្រោះនាំគ្នាយកទៅកប់ដីខ្សាច់តែដោយអកុសល​ជនរងគ្រោះបានស្លាប់បាត់ទៅហេីយ។

ក្រោយមកសមត្ថកិច្ចជំនាញបានពិនិត្យកោសល្យវិច័្ចយរួចក៏បានបញ្ជាក់ថា បុរសដែលបាត់បង់ជីវិតខាងលើពិតជាស្លាប់ដោយឆក់ខ្សែភ្លើងប្រាកដមែន ដូច្នេះសមត្ថកិច្ចបានប្រគល់សពជូនក្រុមគ្រួសារធ្វើបុណ្យតាមប្រពៃណី៕

អត្ថបទ៖ សុខា