ថៃ ដកតំណែងអ្នកនាំពាក្យស្នងការនគរបាលភូមិភាគ ៤ ដោយសារសើច ពេលប្រទេសជាតិកំពុងមានទុក្ខ

ស្នងការ​នគរបាលភូមិភាគ ៤ ថៃ បានចេញបញ្ជាឲ្យដក​លោក​ឧត្តមសេនីយ៍ Paisan Luesomboon ចេញពីតំណែង​អ្នក​នាំ​ពាក្យ​ស្នងការ​នគរបាលភូមិភាគ ៤ ដោយសារតែអ្នកនាំពាក្យរូននេះសើចមិនស្គាល់កាលៈទេសៈ អំឡុងពេលប្រទេសជាតិកំពុងមានទុក្ខ ។

អ្នកសារព័ត៌មានបានរាយការណ៍កាលពីថ្ងៃទី១០ ខែតុលា ឆ្នាំ២០២២ ថា លោកឧត្តមសេនីយ៍ទោ Yanyong Wech-Osoth ស្នងការនគរបាលភូមិភាគ៤ បានចេញបញ្ជាឲ្យដកលោកឧត្តមសេនីយ៍ Paisan ចេញពីតំណែងអ្នកនាំពាក្យស្នងការដ្ឋាន​នគរបាលភូមិភាគ ​៤ ។

ការចេញបញ្ជាឲ្យដកពីតំណែងអ្នកនាំពាក្យរូបនេះ ដោយសារតែកាលពីថ្ងៃទី៦ ខែតុលា ឆ្នាំ២០២២ ស្របពេលដែលប្រទេសថៃជួបហេតុការណ៍ដ៏សាហាវ ពាក់ព័ន្ធនឹងខ្មាន់កាំភ្លើងបាញ់ប្រហារនៅមណ្ឌលថែទាំកុមារនៅខេត្ត Nong Bua Lamphu ដែលបណ្តាលឲ្យ​មនុស្ស​ស្លាប់​ជា​ច្រើន​នាក់នោះ ប៉ុន្តែអ្នកនាំពាក្យរូបនេះបែរជាសើចទៅវិញ មុននឹងឆ្លើយសំណួរទៅអ្នកសារព័ត៌មាន ពោលលោកត្រូវបានគេចោទថា សើចមិនស្គាល់កាលៈទេសៈ ។

គួររំឭកថា ក្រោយការសម្លាប់រង្គាលដោយអតីតប៉ូលិសថៃម្នាក់ឈ្មោះ Panya Khamrap អាយុ ៣៤ ឆ្នាំកាលពីថ្ងៃព្រហស្បតិ៍នៅឯទារកដ្ឋាននៅស្រុក Na Klang ខេត្ត Nong Bua Lamphu រួចហើយ ខ្មាន់កាំភ្លើងក៏បានបាញ់​សម្លាប់​ប្រពន្ធ និង​កូនប្រុសផងដែរ ​មុន​នឹងបាញ់សម្លាប់​ខ្លួនឯង ខណៈដើមហេតុដំបូងគឺកើតឡើង ដោយសារតែមានជម្លោះជាមួយប្រពន្ធ ៕

ប្រែសម្រួលដោយ ៖ គង់ សំអាន

ប្រភព ៖ Naewna

ចុចអាន ៖ លោក ប្រាយុទ្ធ បញ្ជាឲ្យរឹតបន្តឹងច្បាប់កាំភ្លើង និងបង្រ្កាបគ្រឿងញៀន ក្រោយការសម្លាប់រង្គាល