ព័ត៌មានជាតិ

អាល្លឺម៉ង់ ប្ដេជ្ញាបន្តពង្រឹង និងពង្រីកកិច្ចសហប្រតិបត្តិការលើវិស័យសុខាភិបាលជាមួយ កម្ពុជា បន្ថែមទៀត

បានផុស

២ years មុន

នៅ

ថ្ងៃពុធ ១២ តុលា ២០២២

ដោយ

លោក Stefan Anton Messerer ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋ សហព័ន្ធអាល្លឺម៉ង់ថ្មីប្រចាំព្រះរាជាណាចក្រកម្ពុជា បានប្ដេជ្ញាបន្តពង្រឹង និងពង្រីកកិច្ចសហប្រតិបត្តិការលើវិស័យសុខាភិបាលជាមួយកម្ពុជា ឲ្យកាន់តែប្រសើរបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្ដេជ្ញារបស់ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋ សហព័ន្ធអាល្លឺម៉ង់ថ្មីនេះបានធ្វើឡើងកាលពីរសៀលថ្ងៃទី ១១ តុលា ក្នុងជំនួបពិភាក្សាការងារជាមួយលោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល នៅទីស្ដីការក្រសួង។

ក្នុងជំនួបនោះ ឯកអគ្គរដ្ឋទូតសហព័ន្ធអាល្លឺម៉ង់ សម្ដែងនូវការអបអរសាទរដល់រាជរដ្ឋាភិបាលកម្ពុជា ដែលគ្រប់គ្រងការរាលដាល នៃជំងឺកូវីដ-១៩ បានយ៉ាងល្អប្រសើរ ជំរុញឲ្យ កម្ពុជា អាចបើកដំណើរការប្រទេសឡើងវិញ ទាំងសេដ្ឋកិច្ច និងសង្គម តាំងពីខែវិច្ឆិកា ឆ្នាំ ២០២១។

ជាមួយគ្នានេះដែរ ឯកអគ្គរដ្ឋទូត ក៏បានថ្លែងអំណរគុណដល់រាជរដ្ឋាភិបាលកម្ពុជា ដែលបានចាក់វ៉ាក់សាំងកូវីដ-១៩ ដល់មន្ត្រីការទូតអាល្លឺម៉ង់ទាំងអស់ និងប្រជាជនអាល្លឺម៉ង់ ដែលកំពុងរស់នៅកម្ពុជា ដោយឥតគិតថ្លៃ។

ឯកអគ្គរដ្ឋទូត ក៏បានប្ដេជ្ញាបន្តពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរ ជាពិសេសវិស័យសុខាភិបាល ឲ្យកាន់តែប្រសើរឡើងថែមទៀតផងដែរ។

លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានគាំទ្រចំពោះកិច្ចសហប្រតិបត្តិការ ការរឹតចំណងមិត្តភាព និងសាមគ្គីភាពជាប្រពៃណីរវាងប្រទេសទាំងពីរកម្ពុជា-អាល្លឺម៉ង់។

លោករដ្ឋមន្ត្រី បានថ្លែងអំណរគុណដល់ភាគីអាល្លឺម៉ង់ ចំពោះកិច្ចសហការលើវិស័យសុខាភិបាលរវាងប្រទេសទាំងពីរ ជាពិសេសក្នុងកាលៈទេសៈ នៃការប្រយុទ្ធនឹងការរីករាលដាលជំងឺកូវីដ-១៩។

លោករដ្ឋមន្ត្រី រំលឹកថា រដ្ឋាភិបាលសហព័ន្ធអាល្លឺម៉ង់ បានផ្តល់ជំនួយដល់វិស័យសុខាភិបាល តាំងពីឆ្នាំ ១៩៩៤ តាមរយៈទីភ្នាក់ងារអភិវឌ្ឍន៍អន្តរជាតិអាល្លឺម៉ង់ (GIZ) ធនាគារអភិវឌ្ឍន៍អាល្លឺម៉ង់ (KW) រួមមាន ៖ ១) ហិរញ្ញប្បទានសហប្រតិបត្តិការ ដូចជា ៖ គម្រោងផ្គត់ផ្គង់ឱសថសារវ័ន្ត គម្រោងសុខភាពបន្តពូជ គម្រោងគាំពារ សុខភាពសង្គម ហើយបាននិងកំពុងចូលរួមចំណែកក្នុងគម្រោងលើកកម្ពស់គុណភាព និងសមធម៌សុខាភិបាល ដំណាក់កាលទី ១ និងទី ២ និងគម្រោងអាហារូបត្ថម្ភ នៅកម្ពុជា និង ២) ជំនួយបច្ចេកទេស ដូចជា ៖ ការអភិវឌ្ឍធនធានមនុស្ស ការកសាងហេដ្ឋារចនាសម្ព័ន្ធសុខាភិបាល គម្រោងគាំពារសុខភាពសង្គម និងគម្រោងសុខភាពមាតា និងទារក៕

អត្ថបទ ៖ សំអឿន