រថយន្តបែនដឹកដីបែកកង់ ក្រឡាប់ផ្ងារជើង​ទាំងព្រឹក

ភ្នំពេញ ៖ រថយន្តដឹកដីមួយគ្រឿង បើកបរសុខៗស្រាប់តែបែកយ៉ាន់ ធ្វើឱ្យផ្ទុះកង់មុខទាញរេចង្កូតធ្លាក់ផ្លូវក្រឡាប់ផ្ងារជើង សំណាងល្អ២នាក់ឪពុកកូនមិនមានរងរបួស។

ហេតុការណ៍ខាងលើកើតឡើងកាលពីវេលាម៉ោង៨និង១០នាទីព្រឹក ថ្ងៃទី១៦ ខែតុលា ឆ្នាំ២០២២ ស្ថិតនៅតាម​បណ្តោយផ្លូវជាតិលេខ៣ មុខរោងចក្រសីកូ ក្នុងភូមិស្រែញរ៍ សង្កាត់ពងទឹក ខណ្ឌដង្កោ រាជធានីភ្នំពេញ ។

តាមប្រភពនៅកន្លែងកើតហេតុ បានឱ្យដឹងថា មុនកើតហេតុគេបានឃើញ រថយន្ត ម៉ាកនីសាន់ ប្រភេទបែនកង់៦ ពណ៌ស ពាក់ស្លាកលេខ ចង្កូតស្តាំ KDL-1250 បើកបរតាមបណ្តោយផ្លូវជាតិលេខ៣ ក្នុងទិសដៅពីត្បូងទៅជើង លុះដល់ចំណុចកើតហេតុ ស្រាប់តែរថយន្តបែកយ៉ាន់ផ្ទុះកង់មុខខាងស្តាំ ទាញរេចង្កូតធ្លាក់ផ្លូវ ក្រឡាប់ទៅលើមាត់លូ ចាក់ដីចោលតាមចិញ្ចើមផ្លូវ។

ក្រោយកើតហេតុ ភ្លាមៗកម្លាំងសមត្ថកិច្ចមូលដ្ឋានចុះទៅដល់ពិនិត្យមើលជាក់ស្តែង ពុំបង្កដល់អ្នកដទៃ ហើយក៏គ្មានអ្នក​ណា​រងរបួស រួចឱ្យម្ចាស់ហៅរករថយន្តស្ទូចលើយករថយន្តទៅធ្វើការជួសជុលដោយខ្លួនឯង  ៕ សុខា