ទីក្រុងប៉ារីស ផ្ទុះការតវ៉ាទ្រង់ទ្រាយធំជាថ្មី បាតុករខឹងសម្បា ៣ ចំណុច

បាតុកររាប់ពាន់នាក់បានដើរដង្ហែក្បួននៅទីក្រុងប៉ារីសក្នុងការបង្ហាញកំហឹងប្រឆាំងនឹងការកើនឡើងអតិផរណា ភាពអសកម្មពាក់ព័ន្ធការប្រែប្រួលអាកាសធាតុ និងកង្វះប្រេងឥន្ធនៈជាដើម ខណៈកូដកម្មនៅឯរោងចក្រចម្រាញ់ប្រេងបានឈានដល់សប្ដាហ៍ទី ៣ ។

បាតុកម្មប្រឆាំងនឹងការកើនឡើងថ្លៃចំណាយសម្រាប់ការរស់នៅប្រចាំថ្ងៃកាលពីពេលថ្មីៗនេះត្រូវបានរៀបចំឡើងដោយក្រុមប្រឆាំងមកពីគណបក្សឆ្វេងនិយមដែលដឹកនាំដោយលោក Jean-Luc Melenchon ប្រធានគណបក្សបារាំង​មិន​ឱនក្បាល (France Unbowed) ។

ស្របពេលជាមួយគ្នានេះ បាតុកម្មក៏បានអំពាវនាវឲ្យមានការវិនិយោគដ៏ធំប្រឆាំងនឹងវិបត្តិអាកាសធាតុផងដែរ ហើយពួកគេបានទាមទារទៀតលើវិធានការសង្គ្រោះបន្ទាន់ប្រឆាំងនឹងការកើនឡើងតម្លៃខ្ពស់ រួមទាំងការបង្កកតម្លៃថាមពល និងទំនិញសំខាន់ៗជាដើម ។

ចំណែកពាក់ព័ន្ធនឹងប្រេងឥន្ធនៈវិញ, ស្ថានីយជាច្រើនកំពុងប្រឈមនឹងកង្វះប្រេងសាំង ដោយបង្កការលំបាកដល់កម្មកររាប់លាននាក់ និងអ្នកបើកបរយានយន្តផ្សេងទៀតដែលពឹងផ្អែកខ្លាំងលើថាមពលមួយនេះ ។

ទន្ទឹមនោះ វាក៏​ជា​ការ​បង្ហាញ​កំហឹង​កាន់តែខ្លាំងឡើង​ដើម្បី​បង្កើន​សម្ពាធបន្ថែមទៀត​លើ​រដ្ឋាភិបាល​របស់លោក​ប្រធានាធិបតី Emmanuel Macron ផងដែរ ខណៈបច្ចុប្បន្នលោកកំពុងស្ថិតក្នុងស្ថានភាពគ្រោះថា្នក់ ពាក់ព័ន្ធនឹងបញ្ហាវិវាទជាច្រើនក្នុងរដ្ឋសភាបារាំង ។

ដោយឡែកអ្នករៀបចំបាននិយាយថា មនុស្សប្រមាណ ១៤០,០០០ នាក់បានចូលរួមការប្រមូលផ្ដុំគ្នាកាលពីថ្ងៃអាទិត្យ ខណៈព័ត៌មានពីខាងប៉ូលិសវិញបាន​ព្យាករ​ថា មាន​មនុស្ស​ចូលរួមប្រហែល ៣០,០០០ ​នាក់ប៉ុណ្ណោះ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ កាសែត WSJ ៖ វិបត្តិនៅ អ៊ុយក្រែន ធ្វើឲ្យ អាមេរិក ទន់ដៃជើង បើតតាំងក្នុង​សង្គ្រាមជាមួយ ចិន