សម្ដេចតេជោ ហ៊ុន សែន អរគុណពលរដ្ឋនៅបាត់ដំបង ដែលបោះឆ្នោតឲ្យគណបក្សប្រជាជនកម្ពុជា ឈ្នះភ្លូកទឹកភ្លូកដី

សម្ដេចតេជោ​ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានគណបក្សប្រជាជនកម្ពុជា បានថ្លែងអំណរគុណដល់ប្រជាពលរដ្ឋនៅខេត្តបាត់ដំបង ដែលបានបោះឆ្នោតជូនគណបក្សប្រជាជនកម្ពុជា ឲ្យទទួលបានជ័យជំនះយ៉ាងភ្លូកទឹកភ្លូកដី កាលពីការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី ៥កន្លងទៅនេះ។

នៅក្នុងពិធីសំណេះសំណាលជាមួយប្រជាកសិករ ដែលរងគ្រោះដោយទឹកជំនន់ចំនួន ១១,៥២៨ គ្រួសារ ក្នុងខេត្តបាត់ដំបង នាព្រឹកថ្ងៃទី ២៤ ខែតុលានេះថា សម្ដេចតេជោ ហ៊ុន សែន បានថ្លែងអំណរគុណដល់ប្រជាពលរដ្ឋនៅទូទាំងខេត្តបាត់ដំបង ដែលបានបោះឆ្នោតជូនគណបក្សប្រជាជនកម្ពុជា កាលពីការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី ៥ កន្លងទៅនេះ។

សម្ដេចតេជោ ហ៊ុន សែន បានថ្លែងយ៉ាងដូច្នេះថា «ហើយនៅក្នុងឱកាសនេះ ខ្ញុំក៏មិនភ្លេចអរគុណចំពោះ​ប្រជាពរលដ្ឋ នៅក្នុងខេត្តបាត់ដំបង ដែលមានវត្តមាននៅទីនេះក្ដី និងមិនមានវត្តមាននៅទីនេះក្ដី ដែលបានបោះឆ្នោតគាំទ្រ គណបក្សប្រជាជនកម្ពុជា សម្រាប់ការបោះឆ្នោតឃុំ-សង្កាត់កន្លងទៅ ឈ្នះភ្លូកទឹកភ្លូកដី ដែលមានជាមូលដ្ឋានសំខាន់មួយ សម្រាប់ឲ្យគណបក្សប្រជាជនកម្ពុជា ឈានទៅឈ្នះឆ្នោតនៅឆ្នាំ ២០២៣ខាងមុខ»។

សម្ដេចតេជោ ហ៊ុន សែន បានថ្លែងទៀតថា នេះគឺជាប្រភពនៃការលើកទឹកចិត្ត សម្រាប់គណបក្សប្រជាជនកម្ពុជា ហើយក្រុមការងារគណបក្សទាំងថ្នាក់ជាតិ និងថ្នាក់ក្រោមជាតិ នឹងខិតខំប្រឹងប្រែងបម្រើ និងដោះស្រាយសុខទុក្ខប្រជាពលរដ្ឋ នៅគ្រប់មូលដ្ឋានទាំ​ងអស់៕

អត្ថបទ៖ ឃួន សុភ័ក្រ