អាជ្ញាធរខេត្តកណ្តាល ចុះផ្អាកការដ្ឋានជីករណ្តៅដីខុសច្បាប់ពីរកន្លែងនៅស្រុកអង្គស្នួល

លោក ណុប តារ៉ា អភិបាលរងខេត្តកណ្ដាល កាលពីថ្ងៃទី២៥ ខែតុលា ឆ្នាំ២០២២ បានដឹកក្រុមការងារមន្ទីរជំនាញពាក់ព័ន្ធ និងអាជ្ញាធរស្រុក និងព្រះរាជអាជ្ញារងខេត្តកណ្ដាល ចុះត្រួតពិនិត្យ និងឈានដល់ការផ្អាកការដ្ឋានជីករណ្តៅដីខុសច្បាប់ពីរកន្លែង ស្ថិតក្នុងភូមិកណ្ដាល ឃុំឆក់ឈើនាង និងភូមិភ្នំដី ឃុំសំរោងលើក្នុងស្រុកអង្គស្នួល ខេត្តកណ្ដាល ។

លោក ណុប តារ៉ា បានមានប្រសាសន៍ថា ការឈានដល់ការផ្អាកការដ្ឋានជីករណ្តៅដីទាំងពីរកន្លែងនេះដោយសារតែ
ការដ្ឋាននេះ បានបំពានការជីកដីមានជម្រៅហួសការកំណត់ និងគ្មានអាជ្ញាប័ណ្ណឬលិខិតអនុញ្ញាត,មិនធ្វើតាមការណែនាំរបស់អាជ្ញាធរ,ការដឹកជញ្ជូនដីដោយមិនគ្របតង់កៅស៊ូឲ្យបានត្រឹមត្រូវ,និងបង្កឲ្យមានការរំខានដល់ការរស់នៅរបស់ប្រជាពលរដ្ឋនៅជុំវិញទីតាំងការដ្ឋាននោះ ។

លោកអភិបាលរងខេត្តបានស្នើដល់ម្ចាស់អាជីវកម្ម​ត្រូវផ្អាកសកម្មភាពអាជីវកម្មគ្រប់ទម្រង់ រហូតដល់មានការជូនដំណឹង និងត្រូវបំពេញកាតព្វកិច្ចត្រឹមត្រូវស្របតាមច្បាប់ និងលិខិតបទដ្ឋាននានាជាធរមាន និងត្រូវមានវិក័យបត្របង់សួយសារត្រឹមត្រូវស្របតាមច្បាប់ និងលិខិតបទដ្ឋានអោយបានត្រឹមត្រូវ។

ជាមួយគ្នានេះដែរ លោកអភិបាលរងខេត្តក៏បានស្នើដល់មន្ទីរជំនាញពាក់ព័ន្ធ និងអាជ្ញាធរស្រុក ត្រូវធ្វើការពិនិត្យ និងវាយ​តំលៃការដ្ឋានជីករណ្តៅដីមួយកន្លែងនេះមានលក្ខណៈស្តង់ដារបច្ចេកទេសត្រឹមត្រូវដែរឬទេ ដើម្បីរងចាំការដោះស្រាយបន្តទៀត៕

អត្ថបទ៖ សំអឿន