នៅ​ភ្នំពេញ មាន​មនុស្សចាស់អាយុ​ចាប់ពី ៦១ ឆ្នាំ​​ឡើងមាន​​​ជាង ១៣ ម៉ឺននាក់

យោងតាមទិន្ន័យរបស់មន្ទីរផែនការរាជធានីភ្នំពេញឆ្នាំ២០២២ ក្នុងរាជធានីភ្នំពេញមានមនុស្សវ័យចាស់ចាប់ពីអាយុ ៦១ ឆ្នាំឡើងទៅមានចំនួន ១៣៣ ៣៦៣ នាក់ នៃប្រជាពលរដ្ឋរស់នៅក្នុងរាជធានីភ្នំពេញទាំងអស់។

លោកឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានកិត្តិយសអនុគណៈកម្មការមនុស្សចាស់កម្ពុជា​រាជធានីភ្នំពេញ ថ្លែង​​ចូលរួមក្នុង​​ទិវាមនុស្សចាស់កម្ពុជាឆ្នាំ២០២២ថា មនុស្សចាស់មានគុណចំពោះជាតិមាតុភូមិយ៉ាងធំធេង ដែល​បាន​ចូលរួម​ក្នុងកសាងប្រទេសជាតិពីចំណុចសូន្យរហូតមានការអភិវឌ្ឍន៍រីកចំរើនរហូតមកដល់សព្វថ្ងៃនេះ។

លោក​អភិបាល​រាជធានី​ភ្នំពេញបានបញ្ជាក់​យ៉ាងដូច្នេះ​ថា លោកយាយ​លោកតាគឺ​ជាឃ្លាំងចំណេះដឹង​និង​បទពិសោធន៏ដ៏មហាសាល។

ដើម្បីបង្ហាញពីការយកចិត្តទុកដាក់ចំពោះសុខទុក្ខរបស់មនុស្សចាស់ ពិសេសចូលរួមអបអរសាទរទិវាមនុស្សចាស់កម្ពុជា និងទិវាមនុស្សចាស់អន្តរជាតិ១ តុលាឆ្នាំ២០២២ នាព្រឹកថ្ងៃទី២៦តុលានេះ រដ្ឋបាលរាជធានីភ្នំពេញបានជួបជុំសំណេះ​សំណាលជាមួយលោកយាយ លោកតាមកពីតាមបណ្តាខណ្ឌ និងមន្ទីរក្នុងរាជធានីភ្នំពេញចំនួន ៥២៥ នាក់ព្រមទាំងនាំយកអំណោយសម្តេចអគ្គមហាសេនាបតីតេជោហ៊ុន សែន និងសម្តេចគត្តិព្រឹទ្ធបណ្ឌិតប្រគល់ជូនលោកយាយ លោកតានាឱកាសនោះផងដែរ។

ចំពោះអំណោយសម្តេចតេជោ ដែលគ្រគល់ជូនលោកយាយលោកតាទាំង៥២៥នាក់ក្នុងម្នាក់ទទួលបានអង្ករ​២៥​គីឡូក្រាម ត្រីខ ១យួរ,ទឹកត្រី ឬទឹកស៊ីអ៊ីវ៦ដប,ទឹកសុទ្ធ១កេស,ប្រេងឆា២ដប,មី១កេស និងថវិកា ៥ម៉ឺនរៀល៕

អត្ថបទ៖ ស្រីរ័ត្ន