មកស្គាល់មេដឹកនាំពិភពលោកមានឈាមជ័រ ឥណ្ឌា ក្រៅពីនាយករដ្ឋមន្ត្រី​ថ្មីរបស់ អង់គ្លេស

បច្ចុប្បន្នអ្នកនយោបាយដែលមានដើមកំណើតឥណ្ឌាកំពុងបម្រើការនៅក្នុងមុខតំណែងសំខាន់ៗក្នុងប្រទេសនានាជុំវិញពិភពលោក បន្ទាប់ពីលោក Rishi Sunak បានក្លាយជានាយករដ្ឋមន្ត្រីថ្មីរបស់ចក្រភពអង់គ្លេសកាលពីពេលថ្មីៗនេះ ។

សម្រាប់អង់គ្លេស លោក Sunak គឺជាមេដឹកនាំដើមកំណើតឥណ្ឌាដំបូងគេដែលឡើងកាន់តំណែងកំពូលនៅក្នុងប្រទេសមួយនេះ ។ នាយករដ្ឋមន្ត្រីវ័យ ៤២ ឆ្នាំរូបនេះ គឺជាកូនចៅជនអន្តោប្រវេសន៍ហិណ្ឌូដែលមានទ្រព្យសម្បត្តិស្ដុកស្ដម្ភមកពីឥណ្ឌា និងអាហ្វ្រិកខាងកើត និងធ្លាប់កាន់ជារដ្ឋមន្ត្រីក្រសួងហិរញ្ញវត្ថុរបស់អង់គ្លេស ។

នេះគឺជាមេដឹកនាំពិភពលោកចំនួន ៣ រូបផ្សេងទៀតដែលមានដើមកំណើតឥណ្ឌា ក្រៅពីលោក Sunak៖

លោកស្រី Kamala Harris

លោកស្រី Kamala Harris ដែលមានដើមកំណើតនៅរដ្ឋ Tamil Nadu របស់ឥណ្ឌា បច្ចុប្បន្ន​កំពុង​កាន់​តំណែង​ជា​អនុប្រធានាធិបតី​សហរដ្ឋ​អាមេរិក​ក្នុងជួរ​រដ្ឋាភិបាល​ដឹកនាំ​ដោយ​លោក Joe Biden ។

អ្នកនយោបាយដែលជាសមាជិកគណបក្សប្រជាធិបតេយ្យរូបនេះ បានក្លាយជាអនុប្រធានស្ត្រីដំបូងគេក្នុងប្រវត្តិសាស្ត្ររបស់អាមេរិក ខណៈពីមុនមកលោកស្រី Kamala Harris បានបម្រើការជាអគ្គមេធាវីនៃរដ្ឋកាលីហ្វ័រញ៉ា ពីឆ្នាំ ២០១១ ដល់ឆ្នាំ ២០១៧ ។

លោក Antonio Costa

លោក Antonio Costa គឺជានាយករដ្ឋមន្ត្រីបច្ចុប្បន្នរបស់ប្រទេសព័រទុយហ្គាល់ ហើយកំពុងបម្រើការកាន់តំណែងជាលើកទី ៣ របស់គាត់ បន្ទាប់ពីឈ្នះឆ្នោតនៅឆ្នាំ ២០២២ នេះ ។ អ្នកនយោបាយរូបនេះគឺមានដើមកំណើតពាក់កណ្តាលព័រទុយហ្គាល់ និងពាក់កណ្តាលអ្នកក្រុង Goa របស់ឥណ្ឌា ។

លោក Pravind Jugnauth

លោក Pravind Kumar Jugnauth ត្រូវបានជ្រើសរើសជានាយករដ្ឋមន្ត្រីនៃប្រទេសម៉ូរីសនៅឆ្នាំ ២០១៧ បន្ទាប់ពីកាន់តំណែងសំខាន់ៗមួយចំនួននៅក្នុងគណៈរដ្ឋមន្ត្រី ។ អ្នកនយោបាយរូបនេះកើតនៅក្នុងគ្រួសារជនជាតិឥណ្ឌានៅតំបន់ La Caverne ៕

ប្រែសម្រួលដោយ ៖ ជីវ័ន្ត

ប្រភព ៖ Hindustan Times

ចុចអាន ៖ គណៈរដ្ឋមន្ត្រី អង់គ្លេស ១០ រូបលាលែងពីតំណែង ក្រោយនាយករដ្ឋមន្ត្រីថ្មី ចូលកាន់អំណាច