ព័ត៌មានជាតិ

បង្ហើបថ្ងៃបើកការដ្ឋានសាងសង់ផ្លូវល្បឿនលឿនទីពីរទៅបាវិត

បានផុស

២ years មុន

នៅ

ថ្ងៃព្រហស្បតិ៍ ២៧ តុលា ២០២២

ដោយ

លោករដ្ឋមន្រ្តី ស៊ុន ចាន់ថុល បានបង្ហើបគ្រោងការបើកការដ្ឋានសាងសង់ផ្លូវល្បឿនលឿនទីពីរទៅបាវិត ដែលក្រសួងកំពុងដុតដៃដុតជើង ដើម្បីឈានទៅចុះហត្ថលេខាសម្បទានជាមួយក្រុមហ៊ុនសាងសង់នៅឆ្នាំ ២០២៣។

លោក ស៊ុន ចាន់ថុល បានបង្ហើបឲ្យដឹងថា បើការងារបញ្ចប់ទាន់តាមផែនការត្រឹមខែ ៦ ឆ្នាំ ២០២៣ នឹងអាចឈានទៅបើកការដ្ឋានសាងសង់ល្បឿនលឿនទីពីរទៅបាវិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្រ្តីបានបញ្ជាក់ថា ក្រសួងកំពុងប្រញាប់ប្រញាល់បញ្ចប់នីតិវិធី ហើយការមកដល់មេដឹកនាំចិនមកប្រជុំអាស៊ាននៅរាជធានីភ្នំពេញ អាចនឹងឈានទៅការចុះកិច្ចព្រមព្រៀងលើគម្រោងសាងសង់ផ្លូវមួយនេះ។

លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានគណៈកម្មការអន្តរក្រសួងថ្មីៗនេះ បានដឹកនាំកិច្ចប្រជុំពិភាក្សាការងារ ជាមួយក្រុមហ៊ុនសាជីវកម្មស្ពាន និងថ្នល់ចិន (CRBC) ដើម្បីជំរុញការស្ថាបនាផ្លូវល្បឿនលឿនតភ្ជាប់ពីរាជធានីភ្នំពេញទៅក្រុងបាវិត។

ក្នុងកិច្ចប្រជុំនៅទីស្ដីការក្រសួង បានពិនិត្យនិងពិភាក្សាលើកិច្ចព្រមព្រៀងក្របខណ្ឌ កិច្ចសន្យាភាពជាដៃគូរវាងរដ្ឋ និងឯកជនឱ្យបានចប់ក្នុងពេលឆាប់ៗខាងមុខនេះ ដើម្បីឈានទៅបើកការដ្ឋានសម្រាប់គម្រោងផ្លូវល្បឿនលឿនភ្នំពេញ-ក្រុងបាវិត។

គម្រោងផ្លូវល្បឿនលឿនភ្នំពេញ-បាវិត (Phnom Penh-Bavet Expressway) ជាខ្សែផ្លូវថ្មីទាំងស្រុង ដែលមានប្រវែងសរុបប្រហែល ១៣៥ គីឡូម៉ែត្រ។ ផ្លូវនេះសាងសង់ជា ០៤គន្លង តួផ្លូវមានទទឹង ២៥,៥ ម៉ែត្រ។ ខ្សែផ្លូវនេះចេញពីភ្នំពេញនៅចំណុចផ្លូវក្រវ៉ាត់ក្រុងទី៣ កាត់តាមខេត្តកណ្តាល ខេត្តព្រៃវែង និងខេត្តស្វាយរៀង ឆ្ពោះទៅក្រុងបាវិត ព្រំដែនកម្ពុជា-វៀតណាម៕