ខ្លីៗគួរដឹងពី Itaewon​ ដែលជាទីតាំងកើតឧបទ្ទវហេតុរត់ជាន់គ្នា

ដូចដែលប្រិយមិត្តបានដឹង កាលពីយប់ថ្ងៃសោរ៍ ម្សិលមិញនេះ នៅកណ្ដាលរដ្ឋធានីសេអ៊ូល បានកើតឧបទ្ទវហេតុរត់ជាន់គ្នា បណ្ដាលឱ្យមនុស្សយ៉ាងហោច ១៥១នាក់បានស្លាប់ និង ៨១នាក់បានរងរបួស ក្នុងអំឡុងពេលប្រារព្ធពិធីបុណ្យ Halloween។

ហេតុការណ៍នេះ បានកើតឡើងនៅតំបន់កម្សាន្ត Itaewon ចំកណ្តាលទីក្រុងសេអ៊ូល ដែលទីនេះត្រូវបានគេស្គាល់ថា ជាទីតាំងកម្សាន្តពេលរាត្រីដ៏មមាញឹក និងមានមនុស្សកកកុញច្រើនសឹងរាល់ថ្ងៃ ជាពិសេសកំលុងប្រារព្ធពិធីបុណ្យធំៗ។

សង្កាត់ Itaewon ជាកន្លែងកម្សាន្តពេញនិយមសម្រាប់ភ្ញៀវក្នុងស្រុក ជនបរទេស និងភ្ញៀវអន្តរជាតិរាប់សិបនាក់ ហើយវាក៏ជាតំបន់ពាណិជ្ជកម្មដ៏សកម្មផងដែរ។ ទីនេះមានផ្លូវតូចចង្អៀត និងផ្លូវខ្វាត់ខ្វែងជាច្រើនអន្លើ ជាមួយនឹងបារ ហាងផ្សេងៗ និងភោជនីយដ្ឋានដែលបម្រើអាហារប្លែកៗមកពីជុំវិញពិភពលោក។ ប្រភពពី Wikipedia បានឱ្យដឹងថា មានមនុស្សប្រហែល ២២,០០០នាក់រស់នៅក្នុងសង្កាត់នេះ។

ទោះបីជាពិធីបុណ្យ Halloween មិនមែនជាថ្ងៃបុណ្យប្រពៃណីរបស់កូរ៉េខាងត្បូងក៏ដោយ ប៉ុន្តែវាបានក្លាយទៅជាការពេញនិយម ក្នុងរយៈពេលប៉ុន្មានឆ្នាំចុងក្រោយនេះសម្រាប់ប្រជាជនកូរ៉េដែលរស់នៅទីប្រជុំជន ហើយការប្រារព្ធពិធីក្នុងឆ្នាំនេះគឺពិធីដ៏ធំលើកទី១ ចាប់តាំងពីរឹតបន្តឹងការរាតត្បាតនៃជំងឺកូវីដ-១៩ កាលពីចុងឆ្នាំ២០១៩មក។

របាយការណ៍ក្នុងស្រុកបានប៉ាន់ប្រមាណថា មានមនុស្សប្រហែល ១សែននាក់បានទៅលេង Itaewon ដើម្បីប្រារព្ធពិធីបុណ្យ Halloween កាលពីយប់ម្សិលមិញនេះ៕

ប្រែសម្រួល៖ សន្យា

ចុចអាន៖ សាក្សី និងអ្នកនៅរស់ រៀបរាប់ពីហេតុការណ៍ មុនផ្ទុះការជាន់គ្នាស្លាប់នៅ កូរ៉េខាងត្បូង

ចុចអាន៖ ប្រធានាធិបតីកូរ៉េ ប្រកាសកាន់ទុក្ខជូនជនរងគ្រោះ ក្នុងឧបទ្ទវហេតុរត់ជាន់គ្នា