​អាជ្ញាធរខេត្តកំពង់ធំ​សម្អាតក្រុងស្ទឹងសែន​រៀបចំពិធីអុំទូកថ្នាក់ខេត្ត​

រដ្ឋបាលខេត្តកំពង់ធំ​នៅព្រឹកថ្ងៃទី ២ ខែវិច្ឆិកា ឆ្នាំ ២០២២នេះ បានរៀបចំទិវាអនាម័យ សម្អាតតាម បណ្តោយដងស្ទឹងសែន និងតាមទីសាធារណៈ។

លោក ងួន រតនៈ អភិបាលខេត្តកំពង់ធំ លើកឡើងថា ទិវាអនាម័យនៅថ្ងៃនេះ គឺដើម្បីអបអរសាទរ​ពិធីប្រណាំងទូកថ្នាក់ខេត្ត ដែលនឹងរៀបចំនៅថ្ងៃទី៤ និងទី៥ ខែវិច្ឆិកា ឆ្នាំ២០២២ ខាងមុខនេះ។

គោលបំណងនៃកម្មវិធីទិវាអនាម័យគឺដើម្បីបង្កើនការយល់ដឹងដល់សាធារណជនអំពីបរិស្ថាន លើកទឹកចិត្តដល់ប្រជាពលរដ្ឋ និងសហគមន៍ឲ្យក្លាយជាភ្នាក់ងារអភិវឌ្ឍន៍មេត្រីបរិស្ថាន, ផ្សព្វផ្សាយដល់ប្រជាពលរដ្ឋ ចូលរួមទប់ស្កាត់ផ្លាស់ប្តូរភាពអវិជ្ជមាន ចំពោះបរិស្ថាន, លើកទឹកចិត្តដល់ស្ថានប័នឯកជនចូលរួមថែរក្សាបរិស្ថាន និងទទួលបាននូវការគាំទ្រជាសកល ពីមជ្ឈដា្ឋនទូទៅ ក្នុងបេសកម្មភាពទាំងអស់គ្នាដើម្បីបរិស្ថាន និងត្រូវប្តូរឥរិយាបថ “បរិស្ថានស្អាត ផ្តើមចេញពីខ្លួនឯង”។

លោកអភិបាលខេត្តរូបនេះបានឲ្យដឹងថា រដ្ឋបាលខេត្តកំពង់ធំ នឹងរៀបចំកម្មវិធីអុំទូកនៅត្រង់ចំណុចស្ពានស្ទឹងសែន ដែលអមដោយសួនច្បារធំទូលាយ ដែលមានបរិវេណសួនស្ទឹងសែន សួនសម្តេចតេជោ និងវេរ៉ងដាសាងសង់ថ្មី ដើម្បីបង្ករបរិយាកាសសប្បាយរីករាយ រំសាយទុក្ខកង្វល់ប្រជាពលរដ្ឋ ទូទៅក្រោយពេល គ្រោះទឹកជំនន់បានបញ្ចប់។

ទន្ទឹមជាមួយកម្មវិធីអុំទូក រដ្ឋបាលខេត្ត នឹងរៀបចំកម្មវិធីបណ្តែតប្រទីប នៅពេលយប់មានដុតកាំជ្រួច បង្ហោះគោម ប្រគំតន្ត្រី ព្រមទាំងរៀបចំស្តង់​តាំងពិពណ៌លក់ដូរផងដែរ។

កម្មវិធីអុំទូកនៅចុងសប្តាហ៍នេះ មានទូកចូលរួមប្រកួតសរុបចំនួន៤២ទូក មានចំណុះសរុប ១,២៣១នាក់ មកពីប្រាំបួន ក្រុង ស្រុក ទូទាំងខេត្តកំពង់ធំ ក្នុងនោះទូកវែង “ទូក ង” ចំនួន៥ (ទូកមួង ១), ទូកខ្នាតអន្តរជាតិ ចំនួន១៦ ទូក, ទូកផ្កាចារ្យមាន ចំនួន២១ ទូក។

យុវជនចូលរួមទិវាអនាម័យ លើកឡើងផងដែរថា សកម្មភាពដែលសំខាន់របស់ប្រជាពលរដ្ឋទូទៅ លើបរិស្ថាន គឺការទុកដាក់កាកសំណល់ដែលប្រើប្រាស់រួចឲ្យបានត្រឹមត្រូវ។ ទន្ទឹមនេះ ការចូលរួមក្នុងកិច្ច ការងារសង្គម ដូចជាទិវាអនាម័យ ក៏ផ្នែកដែលបង្កើននូវការយល់ដឹងបន្ថែម និងបង្កើននៃការចូលរួម ប្រកបដោយស្ម័គ្រចិត្ត ក្នុងសកម្មភាពដើម្បីខេត្តយើងស្អាត និងមានផាសុខភាពផងដែរ៕

អត្ថបទ៖ ឈាង មករា