ព័ត៌មានជាតិ

ផ្លូវវាងក្រុងសៀមរាប នឹងសាងសង់កាត់តំបន់អភិវឌ្ឍរុនតាឯក និងពាក់ស្នែង

បានផុស

២ years មុន

នៅ

ថ្ងៃពុធ ១៦ វិច្ឆិកា ២០២២

ដោយ

តាមការបញ្ជាក់ពីរដ្ឋមន្រ្តីក្រសួងសាធារណការនិងដឹកជញ្ជូន ផ្លូវវាងក្រុងមួយខ្សែនៅខាងជើងក្រុងសៀមរាបនឹងសាង់សង់កាត់តំបន់អភិវឌ្ឍរុនតាឯកនិងពាក់ស្នែង។

ថ្លែងនៅក្នុងសន្និសីទវឌ្ឍនភាពរយៈពេល ៥ ឆ្នាំរបស់ក្រសួងសាធារណការនិងដឹកជញ្ជូន លោក ស៊ុន ចាន់ថុល បានបង្ហើបពីគម្រោងសាងសង់ផ្លូវក្រវាត់ក្រុងសៀមរាបកាត់តំបន់អភិវឌ្ឍរុនតាឯក និងពាក់ស្នែង ដែលរដ្ឋាភិបាលទើបរៀបចំជាតំបន់អភិវឌ្ឍសម្រាប់ពលរដ្ឋដែលផ្លាស់ទីពីតំបន់រមណីយដ្ឋានអង្គរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ុន ចាន់ថុល បានបញ្ជាក់ថា ផ្លូវវាងខាងជើងក្រុងសៀមរាបដែលនឹងស្ថាបនាកាត់តំបន់រុនតាឯកនិងពាក់ស្នែង បានសិក្សាចប់សព្វដោយប្រើប្រាស់ថវិកាពីធនាគារអភិវឌ្ឍអាស៊ី ADB។

បើតាមលោក ស៊ុន ចាន់ថុល ក្រៅពីផ្លូវវាងខាងជើង រដ្ឋាភិបាលក៏បានគិតគូរសាងសង់ផ្លូវវាងក្រុងសៀមរាបមួយខ្សែទៀតនៅខាងត្បូងតភ្ជាប់ពីផ្លូវជាតិលេខ ៦៤ ទៅពួកដោយប្រើប្រាស់ថវិកាកម្ចីមកពី ACDF របស់កូរ៉េ។

លោករដ្ឋមន្រ្តីបានបង្ហាញពីមោទនភាព ក្រោយគម្រោងហេដ្ឋារចនាសម្ព័ន្ធនានាជាពិសេសផ្លូវ ៣៨ ខ្សែបានបញ្ចប់សម្ពោធដាក់ដំណើរការដែលបានផ្លាស់ប្តូរមុខមាត់ខេត្តសៀមរាប មានផ្លូវស្អាតសម្រាប់ទទួលភ្ញៀវទេសចរណ៍ជាតិ និងបរទេសឃើញពីភាពទាក់ទាញ និងប្លែកភ្នែកនៃទីក្រុងទេសចរណ៍ដ៏សំខាន់នេះ៕