វិមានក្រឹមឡាំង បញ្ជាក់រឿងលោក Putin ផ្ញើពាក្យជូនពរថ្ងៃខួបកំណើតលោក Biden ឬអត់

អ្នកនាំពាក្យវិមានក្រឹមឡាំងលោក Dmitry Peskov បាននិយាយថា ប្រធានាធិបតីរុស្ស៊ី លោក Vladimir Putin នឹងមិនចូលរួម ឬផ្ញើពាក្យជូនពរអបអរសាទរទៅប្រធានាធិបតីអាមេរិក លោក Joe Biden ក្នុងថ្ងៃខួបកំណើតគម្រប់ ៨០ ឆ្នាំ របស់គាត់នៅថ្ងៃអាទិត្យនេះនោះទេ ។

នៅពេលសួរថាតើលោក Putin នឹងផ្ញើសារស្វាគមន៍ថ្ងៃខួបកំណើតទៅកាន់លោក Biden នាថ្ងៃទី ២០ ខែវិច្ឆិកាខាងមុខនេះទេ, លោក Peskov បាននិយាយកាលពីថ្ងៃពុធថា “ប្រសិនបើខ្ញុំមិនច្រឡំទេ លោកប្រធានាធិបតី Putin មិនមានគម្រោងបែបនេះឡើយ” ។

ទន្ទឹមនោះ វាក៏ជាការឆ្លើយតបមួយផងដែរ ដោយសារតែប្រធានាធិបតី​អាមេរិក ​ក៏​មិន​បាន​អបអរសាទរ​ដល់លោក ពូទីន ដូចគ្នា នៅ​ពេល​ដែល​មេដឹកនាំ​រុស្ស៊ី​រូបនេះ បាន​ប្រារព្ធ​ខួប​កំណើត​គម្រប់ ៧០ ឆ្នាំ​របស់​លោក​កាលពី​ថ្ងៃទី ៧ តុលា ។

បច្ចុប្បន្នទំនាក់ទំនងរវាងសហរដ្ឋអាមេរិក និងរុស្ស៊ី ស្ថិតក្នុងកម្រិតទាបបំផុត ចាប់តាំងពីសម័យសង្រ្គាមត្រជាក់មក ដោយទីក្រុងមូស្គូបានស្តីបន្ទោសទីក្រុងវ៉ាស៊ីនតោនចំពោះការធ្វើ “សង្រ្គាមកូនកាត់” ប្រឆាំងនឹងរុស្ស៊ីនៅអ៊ុយក្រែន ។

គួរបញ្ជាក់ថា លោក Joe Biden កើតនៅថ្ងៃទី២០ ខែវិច្ឆិកា ឆ្នាំ១៩៤២ នៅទីក្រុង Scranton រដ្ឋ Pennsylvania ។ លោកជាប្រធានាធិបតីទី ៤៦ របស់សហរដ្ឋអាមេរិក ដែលបានស្បថចូលកាន់តំណែងកាលពីខែមករា ឆ្នាំ ២០២១ ក្នុងវ័យ ៧៨ ឆ្នាំ ហើយក្រោយឡើងកាន់តំណែង លោកបានក្លាយជាប្រធានាធិបតីចាស់ជាងគេ មិនធ្លាប់មាន ក្នុងប្រវត្តិសាស្ត្រអាមេរិក ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ លោក បៃដិន ជំពប់ជើង ពេលឡើងជណ្ដើរក្នុងកិច្ចប្រជុំ G20 នៅកោះបាលី