អ៊ុយក្រែន​ ថា ខ្លួនអាច​ដណ្តើម​យកតំបន់ Crimea នៅ​ខែ​ក្រោយ

អនុរដ្ឋមន្ត្រីការពារជាតិអ៊ុយក្រែន លោក Vladimir Gavrilov បាននិយាយថា ទីក្រុងកៀវ អាចដណ្តើមយកតំបន់ Crimea របស់រុស្ស៊ី នៅត្រឹមចុងឆ្នាំនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងបទសម្ភាសន៍ជាមួយ Sky News កាលពីថ្ងៃសៅរ៍ទី១៩ខែវិច្ឆិកា លោក Gavrilov និយាយថា ព្រឹត្តិការណ៍ភ្លាមៗនិងមិននឹកស្មានដល់ឬគេហៅថា “ព្រឹត្តិការណ៍ក្ងានខ្មៅ” អាចនឹងនាំមកនូវជ័យជម្នះ។

លោកនិយាយថា “ខ្ញុំគិតថា រុស្ស៊ី អាចជួបប្រទះព្រឹត្តិការណ៍ក្ងានខ្មៅនៅក្នុងប្រទេសរបស់ពួកគេ នៅខាងក្នុងប្រទេសរុស្ស៊ី ហើយនេះអាចរួមចំណែកដល់ភាពជោគជ័យរបស់យើង ជាមួយនឹងតំបន់ Crimea។ លោកបន្ថែមថា ក៏មានជម្រើសយោធាមួយផងដែរបូករួមជាមួយនឹងការបញ្ចូលគ្នានៃកងកម្លាំង ធនធាន និងអ្វីផ្សេងទៀត។

លោក Gavrilov បន្តថា “ឧទាហរណ៍ យើងអាចឈានជើងចូល Crimea នៅត្រឹមចុងខែធ្នូ។ អាចទៅរួច”។

នៅពេលត្រូវបានសួរថាតើព្រឹត្តិការណ៍ “ក្ងានខ្មៅ” ប្រភេទណា អាចកើតឡើងក្នុងរយៈពេលប៉ុន្មានខែខាងមុខនេះ លោក Gavrilov បានផ្តល់យោបល់ថា ប្រធានាធិបតីរុស្ស៊ីលោក វ្ល៉ាឌីមៀរ ពូទីន អាចបាត់ខ្លួន ដោយសារហេតុផលមួយចំនួនដូចជា បញ្ហារាងកាយ និងនយោបាយ ឬថា សាធារណជនរុស្ស៊ីអាចមិនសប្បាយចិត្ត ជាមួយនឹងស្ថានភាពនៅសមរភូមិ។

គួរបញ្ជាក់ថា តំបន់ Crimea បានផ្តាច់ខ្លួនចេញពីអ៊ុយក្រែន ហើយបានបោះឆ្នោតចូលរួមជាមួយរុស្ស៊ី ភ្លាមៗបន្ទាប់ពីរដ្ឋប្រហារឆ្នាំ ២០១៤ នៅទីក្រុងកៀវ។

កាលពីខែកក្កដា អតីតប្រធានាធិបតីរុស្ស៊ី លោក Dmitry Medvedev និយាយថា ការបដិសេធរបស់អ៊ុយក្រែន ឬរដ្ឋណាតូ ដើម្បីចាត់ទុក Crimea ជាផ្នែកមួយនៃប្រទេសរុស្ស៊ី នឹងត្រូវបានចាត់ទុកថាជាការគំរាមកំហែង៕

ប្រែសម្រួល៖ Vann Vann

ប្រភព៖ RT

ចុចអាន៖ ធ្វើទស្សនកិច្ចលើកដំបូងនៅទីក្រុងកៀវ, លោក Sunak ប្រកាសកញ្ចប់ជំនួយ ៦០លានដុល្លារ ឲ្យអ៊ុយក្រែន