លោក ឌិត ទីណា កោតសរសើរពងទាកូនឆ្ងាញ់​នៅឃុំស្រែរនោង ខេត្តតាកែវ

រដ្ឋមន្រ្តីក្រសួងកសិកម្ម លោក ឌិត ទីណា បានកោតសរសើរពងទាកូន នៅឃុំស្រែរនោង ខេត្តតាកែវថា មានឱជា​រសឆ្ងាញ់។ លោករដ្ឋមន្រ្តីលើកឡើងបែបនេះ នៅក្នុងដំណើរចុះជួបសំណេះសំណាល និងសួរសុខទុក្ខផ្ទាល់ ជាមួយប្រជាកសិករនៅឃុំស្រែរនោង ស្រុកត្រាំកក់ ខេត្តតាកែវ ថ្ងៃទី ២២ ខែ វិច្ឆិកា ឆ្នាំ ២០២២។

លោករដ្ឋមន្រ្តី បានលើកឡើងដូច្នេះថា « កាលណានិយាយអំពី “ពងទាកូនឆ្ងាញ់”​ អ្នកណាក៏នឹកដល់​ “ពងទាកូន​ស្រែរនោង” នៅខេត្តតាកែវយើងដែរ។​ សូមកោតសរសើរបងប្អូនប្រជាពលរដ្ឋនៅឃុំស្រែរនោង​ ស្រុកត្រាំកក់​ ខេត្តតាកែវ​ ទាំង១៩ក្រុម​ ដែលរួមគ្នាផលិតពងទាកូនប្រកបដោយឱជារស»។

ជាមួយគ្នានេះ ដើម្បីឱ្យពងទាកូនមានតម្លៃកាន់តែល្អ​ ព្រមទាំងមាន​ការពេញនិយមគាំទ្រពីអ្នកទទួលទានកាន់តែច្រើន​ថែមទៀត​ សូមបងប្អូនបន្តរៀបចំញែកពងទាកូនតូច ល្មម​ និងធំ​ ឱ្យត្រូវទៅតាមចំណូលចិត្តរបស់អតិថិជន ព្រមទាំងយកចិត្តទុកដាក់លើរបៀបស្ងោរពងទាកូន​ផងដែរ។ នេះជាការផ្តល់អនុសាស្រ្តរបស់លោក ឌិត ទីណា ជូនដល់ប្រជាពលរដ្ឋនៅក្នុងតំបន់នេះ។

លើសពី​នេះទៀត លោករដ្ឋមន្រ្តី បានលើកទឹកចិត្តឱ្យកសិករ ខិតខំស្វែងយល់បន្ថែមពីតម្រូវការទីផ្សារ​ និងផលិតពងទាកូន​នៅ​ក្នុងកម្រិតមួយ ដែលអាចរក្សាបាន​ ទាំងគុណភាព​ ទាំងតម្លៃ​ និងទាំងកេរ្តិ៍ឈ្មោះ​ពងទាកូនឆ្ងាញ់ស្រែរនោងផងដែរ៕