វ័យជាង ៥០​ ឆ្នាំ​ ស្រ្តី​ម្នាក់​លក់​បុកល្ហុ​ង​តាម​ផ្លូវ សប្បាយចិត្តពេល​ភ្ញៀវ​សរសើរ​ឆ្ងាញ់ម្តងៗ​

​ជាអ្នក​លក់​បុកល្ហុង​នៅ​តាម​ផ្លូវ​ធម្មតា​ ​ស្រ្តី​​ម្នាក់អាច​​រក​ចំណូលបាន​ល្មមគ្រប់គ្រាន់សម្រាប់ជីវភាពគ្រួសារប្រចាំថ្ងៃ។

ក្នុង​​វ័យ​ជាង ៥០​ឆ្នាំ អ្នកស្រី មុំ បាន​មក​រស់​នៅភ្នំពេញជាង ១១ឆ្នាំំ​មកហើយ។ ​ឃ្លាតឆ្ងាយ​ពីស្រុកកំណើត​ ​ដើម្បី​អាច​ទទួលបាន​ចំណូលខ្លះៗមកផ្គត់ផ្គង់សេដ្ឋកិច្ច​នៅ​ក្នុង​គ្រួសារ​ប្រចាំ​ថ្ងៃ អ្នកស្រី មុំ បាន​ចាប់​យក​មុខ​របរ​ជា​អ្នក​លក់​បុក​ល្ហុង ដោយ​ហេតុ​ថា​ខ្លួន​ធ្លាប់​បាន​រៀន​ជំនាញ​ចេះ​ស្ទាត់​ពី​ក្មួយ​ស្រី ក្នុង​រយៈ​ពេល ២​ឆ្នាំ​ចុង​ក្រោយ​នេះ។

ថ្លែង​ប្រាប់​កម្ពុជាថ្មី ស្រ្តី​រូប​នេះ​បាន​បញ្ជាក់ថា «ខ្ញុំបាន​សម្រេច​ចិត្តចាប់យកអាជីពជាអ្នកលក់បុកល្ហុងនៅតាមផ្លូវ ដោយ​អាជីពមួយ​នេះមិនបានធ្វើឱ្យខ្ញុំខកបំណងឡើយ វាអាចផ្តល់ចំណូលសមល្មមដល់ខ្ញុំជាប្រចាំថ្ងៃ»។

« ខ្ញុំ​អាច​លក់​បាន ៣០ទៅ ៤០​ប្រអប់​ក្នុង​មួយ​ថ្ងៃ ​​អាចឱ្យខ្ញុំទទួលបានកម្រៃ​បានច្រើនសមរម្យ​ ហើយដោយសារចំណូល​មួយ​នេះ​ វាអាចជា​​ផ្នែក​តូច​មួយ​​នៃ​ការ​ផ្គត់ផ្គង់​គ្រួសារ និង​សម្រាប់​កូន​ៗ សិក្សា​»។ អ្នកស្រីបន្ថែម។

​ទោះបី​ចំណូល​បាន​ល្មមគួរ​សម តែ​ក៏​ត្រូវ​​ផាត់​ការ​ចំណាយ​ទៅលើការទិញ​​​របស់​របរដូច​ជា​បង្គា ប៉ាតេ​ ងាវ ក្ដាម និងគ្រឿង​ផ្សេងៗ​ទៀត​។ យ៉ាង​ណា​អ្នកស្រី មុំ ក៏​សប្បាយ​ចិត្ត​ការ​ទទួល​បាន​ចំណូលលើ​អាជីព​មួយ​នេះ ព្រោះ​រាល់​ភ្ញៀវ​ដែល​បាន​មក​ទិញ​បុក​​ល្ហុង​តែ​សរសើរ​​ថា បុក​ឆ្ងាញ់ ជាប់​មាត់​​ រស់​ជាតិ​ដិត មិន​ចាញ់​នៅ​ក្នុង​ហាង ដែល​ពាក្យ​ទាំង​អស់​នេះ​ ជា​កម្លាំង​ចិត្ត​ដល់​ស្ត្រី​វ័យជាង ៥០ឆ្នាំ​រូបនេះ ក្នុង​ការ​ប្រកបអាជីព​នេះបន្តទៀត ទោះ​មានវ័យចាស់បន្តិចមែន៕

ដោយ៖ ថារី