តើច្បាប់អាចជួយដោះស្រាយបានទេ បើមេតុងទីន ឬកូនតុងទីន មិនព្រមសងប្រាក់?

លោក សេង សឹង្ហហេង សមាជិកគណៈមេធាវីកម្ពុជា ថា បើសិន​ជា​មេតុងទីន​បោកយកលុយ​កូនតុងទីន ឬកូនតុងទីន គេចវេសមិនព្រម​សងប្រាក់តាមគ្រប់រូបភាព និងករណី​មិនមានលទ្ធភាព​បង់សង​ត្រឡប់វិញ គឺអាចប្តឹង​ទៅ​តុលាការរដ្ឋប្បវេណី ដើម្បីទាមទារ​ប្រាក់​បាន។

លោកមេធាវីពន្យល់ថា ករណី​មិនព្រមបង់ប្រាក់​សងត្រឡប់វិញ​តាមពេលកំណត់ គឺ​អាច​​មក​​ពី​​អ្នកខ្លះ​​មាន​​ចេតនា​សង តែមិនមាន​​លទ្ធភាព​សង ខ្លះ​ទៀត​គឺ​ចង់​​គេចវេស​​តែម្តង ឬអាច​​បោកប្រាស់​តាមរយៈ​​ការចេញ​​សែក​ធានា ដែល​​មិន​អាច​​ប្រើប្រាស់​​បាន​​ជាដើម។
យ៉ាងណាមិញ លោក​ក៏​បាន​លម្អិត​បន្ថែម​ពី​ករណី ៣ ដែល​មេតុងទីន និង​កូន​តុងទីន អាច​ដាក់​ពាក្យ​បណ្តឹង​បាន ដោយបញ្ជាក់ថា ច្បាប់​ក៏​ទទួលស្គាល់​កិច្ចសន្យា​ផ្ទាល់មាត់​ផងដែរ។
ខាងក្រោមនេះ ជាករណីទាំង៣ ដែលអ្នកលេងតុងទីនគួរស្វែងយល់ ៖

១. មានចេតនាសង តែមិនមានលទ្ធភាពសងបានទាន់ពេលវេលា
បើសិនជាអ្នកបង់ មិនមានលទ្ធភាពបង់​តាមកំណត់ ព្រោះតែក្ស័យធន ឬមាន​បញ្ហាជីវភាព​ជាដើម ក្នុងលក្ខខណ្ឌនៃកាតព្វកិច្ចបង់ប្រាក់តាមកិច្ចសន្យា ដោយផ្ទាល់មាត់ក្តី ឬក្រដាសស្នាមក្តី ករណី​ម្ចាស់ប្រាក់​​មិនសុខចិត្ត គឺអាចប្តឹង​ទៅតុលាការរដ្ឋប្បវេណីទាមទារប្រាក់បាន។

២. មានចេតនាគេចវេសតាមគ្រប់រូបភាព
ប្រសិនបើកូនតុងទីនដែលដេញបាន ហើយគេចវេសមិនបង់ត្រឡប់ទៅវិញ​តាមគ្រប់មធ្យោបាយ ដោយការ​ប្តូរទីលំនៅ ឬមិនចេញ​មកជួប គឺអាចចាត់ចូល​ទៅ​ក្នុង​បទល្មើស​រំលោភ​សេចក្តីទុកចិត្ត។

៣. ចេញសែកធានា តែមិនធ្វើតាមកាតព្វកិច្ច
ក្នុងករណីចេញជាសែកឱ្យមេដើម្បីធានា (ដាក់កាលបរិច្ឆេទសង) ប៉ុន្តែ​នៅពេល​ដល់ពេលវេលាកំណត់ បែរជាមិនបំពេញ កាតព្វកិច្ច ដូច្នេះមេតុងទីន​អាច​កាន់​សែក​មួយសន្លឹក​ហ្នឹងទៅប្តឹងបុគ្គលនោះ ទាក់ទងនឹង​ការ​ចេញ​សែក​ស្អុយ​មិនមានប្រាក់។ លោកបន្ថែមថា ក្នុងលក្ខខណ្ឌនេះ បើតាមផ្លូវច្បាប់ បុគ្គលនោះនឹងអាចទទួលទណ្ឌកម្មផ្សេងមួយទៀត។

ដោយឡែក ក្នុងករណីដែលមេតុងទីន ឬកូនតុងទីន មិនមានប្រាក់សង ប៉ុន្តែមានជាទ្រព្យសម្បត្តិដូចជាផ្ទះ ឡាន ឬដីជាដើម-ល- គឺអាចប្តឹងទៅតុលាការរដ្ឋប្បវេណី​ទាមទារ​ឱ្យបុគ្គលនោះ​សងវិញបាន ឬអាចប្តឹងសុំរក្សាការពារ​​​(ដីការក្សាការពារ) របស់ទ្រព្យបុគ្គលនោះ មិនឱ្យដោះដូរ ផ្តល់ជាអំណោយ(ផ្ទេរ) លក់ ឬជួលបាន ដោយតម្រូវឱ្យមាន​អង្គហេតុ​ត្រឹមត្រូវ មិនមាន​និតិវិធី​ស្មុគស្មាញ​នោះទេ។

ទោះច្បាប់អាចជួយដោះស្រាយ​នៅពេល​មេតុងទីន​បោកយក​លុយកូនតុងទីន ឬកូនតុងទីន គេចវេសមិនព្រម​សងប្រាក់ ក៏ លោកមេធាវីបានផ្តល់ដំបូន្មានថា អ្នកដែលមានបំណងលេងតុងទីន កុំលេងល្អជាង ព្រោះមានហានិភ័យខ្ពស់ ដោយ​សារ​តែការ​ប្រាក់ខ្ពស់ ចំណែកនិតិវិធីនៃការដោះស្រាយ នៅពេលដែលមានបញ្ហាកើតឡើង គឺស្មុគស្មាញ និងអាចអូសបន្លាយពេលយូរ៕