មនុស្សមួយចំនួនប្រហែលមិនទាន់ដឹង មូលហេតុ Ronaldo ប្រេស៊ីល កាត់សក់បែបនេះ

កីឡាករ Ronaldo Luís Nazário de Lima បានធ្វើឲ្យពិភពលោកចងចាំមិនភ្លេចអំពីម៉ូដសក់ដ៏ចម្លែករបស់គាត់ នៅពេលក្រុមបាល់ទាត់សាំបាប្រេស៊ីល ឈ្នះជើងឯកពានរង្វាន់ World Cup ឆ្នាំ២០០២។

អតីតខ្សែប្រយុទ្ធក្លិប Real Madrid និង Inter Milan រូបនេះ បានកោរសក់សឹងតែទាំងអស់ ប៉ុន្តែបានទុកសក់មួយចំណិតនៅផ្នែកខាងមុខ។ ចាប់តាំងពីពេលនោះមក ម៉ូដសក់នេះ ត្រូវបានគេស្គាល់និងបង្កភាពល្បីល្បាញ។

ចំពោះមូលហេតុដែល Ronaldo សម្រេចចិត្តកាត់សក់មូដនេះ គាត់បាន​និយាយ​ថា “ខ្ញុំ​មាន​របួស​​ជើង ហើយ​អ្នក​រាល់​គ្នាតែងតែ​និយាយ​អំពីរបួស​នោះ។ ខ្ញុំបានសម្រេចចិត្តកាត់សក់របស់ខ្ញុំ ហើយទុកមួយចំណិត។ ខ្ញុំមកហ្វឹកហាត់ ហើយគ្រប់គ្នាបានឃើញខ្ញុំសក់មិនស្អាត។ មនុស្សគ្រប់គ្នានិយាយតែអំពីសក់ ហើយក៏ភ្លេចអំពីរបួសជើង”។

Ronaldo និយាយទៀតថា “ខ្ញុំអាចរក្សាភាពស្ងប់ស្ងាត់ និងសម្រាកបានច្រើនជាងមុន ហើយផ្តោតលើការហ្វឹកហាត់របស់ខ្ញុំ។ ប៉ុន្តែខ្ញុំមិនមានមោទកភាពចំពោះសក់ខ្លួនឯងទេ ព្រោះវាមើលទៅចម្លែកណាស់។ យ៉ាងណាក៏ដោយ វាគឺជាវិធីដ៏ល្អក្នុងការផ្លាស់ប្តូរប្រធានបទ”។

គួរបញ្ជាក់ថា Ronaldo គឺជាកីឡាករស៊ុតបញ្ចូលទីបានច្រើនបំផុតក្នុងព្រឹត្តិការណ៍ world Cupឆ្នាំ២០០២ ដោយរកបាន៨គ្រាប់ និងបញ្ជូនបាល់ឲ្យមិត្តរួមក្រុមបានមួយគ្រាប់៕

ប្រែសម្រួល៖ Vann Vann

ប្រភព៖ Daily Star

ចុចអាន៖ រឿង៣យ៉ាង Ronaldo ធ្វើឲ្យពិភពលោកភ្ញាក់ផ្អើល កាលពីយប់មិញ