មន្ត្រីជាន់ខ្ពស់ក្រសួងអប់រំ ៖ ​ការប្រឌិតព័ត៌មានទាក់​ទងនឹងតម្លាភាព នៃការប្រឡងបាក់ឌុបជាទង្វើដ៏អសីលធម៌បំផុត

មន្ត្រីជាន់ខ្ពស់ក្រសួងអប់រំ យុវជន និងកីឡា បានលើកឡើងថា ការប្រឌិត និងភូតកុហកព័ត៌មានទាក់​ទងនឹងតម្លាភាពនៃការប្រឡងបាក់ឌុប ជាទង្វើដ៏អសីលធម៌បំផុត និងដែលគួរឲ្យស្អប់ខ្ពើម។ ការលើកឡើងនេះ បន្ទាប់ពីមានបុគ្គលទុច្ចរិត និងក្រុមជនអគតិមួយចំនួន បានផ្សព្វផ្សាយព័ត៌មានថា ស.ស.យ.ក បានរៀបចំបញ្ជីរាយនាមសមាជិក ស.ស.យ.ក ដែលត្រូវប្រឡងបាក់ឌុប ផ្ញើទៅក្រសួងអប់រំ យុវជន និងកីឡា។

លោកបណ្ឌិត សាន វឌ្ឍនា អនុរដ្ឋលេខាធិការក្រសួងអប់រំ យុវជន​ និងកីឡា បានលើកឡើងនៅលើគណនីហ្វេសប៊ុករបស់លោក នៅរសៀលថ្ងៃទី ៥ ខែធ្នូ ឆ្នាំ ២០២២នេះថា ការប្រឌិត និងភូតកុហកព័ត៌មានទាក់​ទងនឹងតម្លាភាពនៃការប្រឡងបាក់ឌុប គឺនេះជាទង្វើដ៏អសីលធម៌បំផុត និងគ្មានការទទួលខុសត្រូវទាល់តែសោះ។ សម្តីបែបនេះ ជាការប្រមាថដល់កិច្ចខិតខំប្រឹងប្រែងរៀនសូត្រ របស់សិស្សា​នុសិស្សដែលជាបេក្ខជនគ្រប់រូប។

លើសពីនេះ សម្តីបែបនេះជាការមើលស្រាល ដល់ការបម្រើតួនាទីប្រកបដោយវិជ្ជាជីវៈ នៃបុគ្គលិកអប់រំគ្រប់ជាន់ថ្នាក់ អាជ្ញាធរពាក់ព័ន្ធ ក៏ដូចជាអ្នកស្មគ្រចិត្តសង្កេតការណ៍ ដែលកំពុងចូលរួមក្នុងដំណើរការប្រឡងបាក់ឌុបនេះ។

លោកបណ្ឌិត សាន វឌ្ឍនា បានលើកឡើងដែរថា សសយក ជារណសិរ្សយុវជនបើកទូលាយ សម្រាប់ការចូលរួមក្នុងការងារដោយស្ម័គ្រចិត្ត ក្នុងបុព្វហេតុជាតិនិងមាតុភូមិ និងការងារមនុស្សធម៌។ សសយក គឺសម្រាប់យុវជនគ្រប់រូប ដែលដាក់តម្កល់ឧត្តមប្រយោជន៍ជាតិជាធំ តម្កល់មនសិការការងារជាចម្បង និងតម្កល់សីលធម៌សង្គមជាតម្រាយផ្លូវ។

មន្ត្រីជាន់ខ្ពស់ក្រសួងអប់រំរូបនេះ បានបញ្ជាក់ថា «សូមប្អូនៗបេក្ខជនទាំងអស់មេត្តាចងចាំថា “អ្នកចេះគឺជាប់” ហើយការប្រឡងបាក់ឌុប នឹងដំណើរការទៅប្រកបដោយយុត្តិធម៌ តម្លាភាព ស្របតាមគោលការណ៍ច្បាប់ ហើយដែលលទ្ធផលអាចទទួលយកបាន»៕