មកដឹងឲ្យហើយ ថ្លៃចំណាយ និងចំណូលរបស់ រុស្ស៊ី សម្រាប់ឆ្នាំ ២០២៣ ដល់ ២០២៥

ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានចុះហត្ថលេខាលើច្បាប់ស្តីពីថវិកាសហព័ន្ធសម្រាប់ឆ្នាំ ២០២៣ និងរយៈពេលដែលបានគ្រោងទុកពីឆ្នាំ ២០២៤ ដល់ឆ្នាំ ២០២៥ ផងដែរ ។

យោងតាមច្បាប់នេះ ការចំណាយថវិការបស់រុស្ស៊ីនឹងមានចំនួនសរុប ៤៦៥.៧ ពាន់លានដុល្លារនៅឆ្នាំ ២០២៣ ខណៈឆ្នាំ ២០២៤ មានចំនួន ៤៧២.១ ពាន់លានដុល្លារ និង ៤៦៨.៩ ពាន់លានដុល្លារសម្រាប់ឆ្នាំ ២០២៥ ។

ចំណែកសម្រាប់ប្រាក់ចំណូលវិញ រុស្ស៊ីរំពឹងថានឹងមានចំនួន ៤១៩.១ ពាន់លានដុល្លារក្នុងឆ្នាំ ២០២៣ ខណៈឆ្នាំ ២០២៤ មានចំនួន ៤៣៦.៨ ពាន់លានដុល្លារ និង ៤៤៨ ពាន់លានដុល្លារសម្រាប់ឆ្នាំ ២០២៥ ។

ដោយឡែនចំពោះឱនភាពនៅឆ្នាំ ២០២៣ រុស្ស៊ីត្រូវបានព្យាករថា មានចំនួន ២ ភាគរយ ឬប្រហែល ៤៩.៣ ពាន់លានដុល្លារ នៃផលិតផលក្នុងស្រុកសរុប ខណៈប្រាក់កម្ចីភាគច្រើនត្រូវបានគេគ្រោងនឹងប្រើប្រាស់ដើម្បីគ្របដណ្តប់ឱនភាពនេះ ។ ទន្ទឹមនឹងនោះ គេរំពឹងថាឱនភាពថវិកានឹងធ្លាក់ចុះបន្តិចម្តងៗវិញមកត្រឹម ០.៧ ភាគរយនៅឆ្នាំ ២០២៥ ។

គួរបញ្ជាក់ថា ការចុះហត្ថលេខាលើច្បាប់ស្ដីពីចំណូល និងចំណាយលើថវិកាសហព័ន្ធរបស់លោក ពូទីន សម្រាប់ ៣ ឆ្នាំខាងមុខបានកើតឡើង បន្ទាប់ពីលោកប្រធានាធិបតីរូបនេះក៏ទើបតែប្រកាសពីចំណូល ៨ ពាន់លានដុល្លារសម្រាប់ការលក់អាវុធទៅកាន់ទីផ្សារពិភពលោកក្នុងឆ្នាំ ២០២២ នេះ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ អាមេរិក អាចនឹងអស់លុយឲ្យ អ៊ុយក្រែន ទប់ រុស្ស៊ី (មានវីដេអូ)